Jýrnalısterge dórekilik kórsetken Shıeli kentiniń ákimine sógis berildi
QYZYLORDA. QazAqparat - Qyzylorda oblysy Shıeli kentiniń ákimi Ǵabıt Amanjolovtyń tártiptik isi Qyzylorda oblystyq ádep jónindegi keńestiń otyrysynda qaraldy. Ol aýdan ákiminiń esep berý kezdesýinde jýrnalısterge dóreki minez kórsetip, turǵyndarmen sóılesý barysynda ádep saqtamaǵan, dep habarlaıdy QazAqparat tilshisi.
Shıeli kentiniń ákiminiń atalmysh áreketine baılanysty Ádep jónindegi keńes hatshylyǵynyń qyzmetkeri qyzmettik tekserý júrgizgen. Nátıjesinde jýrnalıster usynǵan beıneqordaǵy kórinister tarazylandy. Onda QR memlekettik qyzmetshileriniń Ádep kodeksiniń 5-tarmaǵy 2,7 tarmaqshalarynda kózdelgen minez-qulyq standarttarynyń buzylǵany anyqtaldy.
«Ádep jónindegi keńestiń otyrysynda Shıeli kentiniń ákimi qyzbalyqqa salynǵanyn, bul istiń endi qaıtalanbaıtynyn jetkizdi. Oǵan sógis túrindegi shara kórildi», - dep málim etti QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha memlekettik qyzmeti isteri departamenti.
