Jýrnalısterge arnalǵan SOS-qosymsha paıda boldy
ALMATY. QazAqparat - Almatyda Qazaqstan jýrnalısteriniń Soz Sende SOS-qosymshasynyń tusaýkeseri ótti, dep habarlaıdy QazAqparat tilshisi.
Jańa aqparattyq resýrs 3 bólimnen turady. Eń bastysy jýrnalıst shuǵyl jaǵdaıda qalǵan kezde SOS tetigin basady. Onyń áriptesterine geolokatsııasy belgilengen shuǵyl habarlama túsedi.
Shuǵyl aqparat tek qosymshada ǵana emes, bólek saıtta da jarııa etiledi. Osylaısha áriptesteriniń shtattan tys jaǵdaıy týraly barlyq jýrnalıster biletin bolady.
Qosymshanyń basqa bólimderi jýrnalısterdiń biliktiligin arttyrýǵa baǵyttalǵan.
«Chıtalka» bóliminde qajetti quqyqtyq aqparattar saqtalǵan. Máselen jýrnalısti ustap áketken jaǵdaıda ol qalaı áreket etedi nemese jýrnalıstiń saýalyna jaýap kelmeı jatqan jaǵdaıda, sot protsesi kezinde jýrnalıstiń qandaı quqyǵy bar ekendigi týraly aqparat bolady.
«Múmkindikter» bóliminde jýrnalısterge arnalǵan baǵdarlamalar, stıpendııalar, granttardyń RSS-jiberýleri jınaqtalady.
Soz Sende qosymshasyn Sot reporterleri gıldııasy jasady.
2016 jyly uıym ókilderi BUU halyqaralyq kommýnıkatsııalyq damý baǵdarlamasynyń úılestirýshilerine usynys bildirgen bolatyn.
Qosymshany jasaý úshin gıldııa 7 myń AQSh dollaryn utyp aldy.
Soz Sende jýrnalısterge arnalǵan mobıldi qosymsha BUU jýrnalısterdiń qaýipsizdigin qamtamasyz etý josparynda kózdelgen máselelerdiń údesinen shyǵyp otyr.
