Jýrnalısterge arnalǵan kezekti baıqaý jarıalandy
ASTANA. QazAqparat - Almaty qalalyq Din isteri basqarmasy men Ulttyq jýrnalıstik zertteý ortalyǵy din salasyndaǵy ózekti máselelerge arnalǵan úzdik shyǵarmalar baıqaýyn jarııalady. Oǵan Almatyda tirkelgen buqaralyq aqparat quraldarynyń jýrnalısteri qatysa alady, dep habarlaıdy QazAqparat tilshisi Ulttyq jýrnalıstik zertteý ortalyǵy taratqan baspasóz habarlamasyna silteme jasap.
«Búgingi tańda dinı radıkalızm, ekstremızm men terrorızm jer jahandy qatty alańdatyp otyr. Álemdi dúrliktirip jatqan oqıǵalar oǵan naqty mysal. Ókinishke oraı, mundaı keleńsizdiktermen keıingi jyldary biz de betpe-bet kele bastadyq. Onyń basty sebebi - keıbir qoǵam músheleriniń qoljetimdi aqparattardy saraptaı bilmeýinde jatsa kerek. Óıtkeni, dinı jáne quqyqtyq turǵydan saýattylyǵy jetispegen adamnyń kez kelgen dinı bastamaǵa saýatty túrde qaraı almaıdy. Osynyń saldarynan teris aǵymnyń jeteginde ketkenin bilmeıtin, óz ulttyq tabıǵatyna qarsy shyqqanyn sezinbeıtin, jalpymemlekettik qaǵıdattarǵa qaıshy keletinin uǵynbaıtyn, jalpyadamzattyq ıgilikterdi moıyndamaıtyn oıy oqshaý azamattar men toptar paıda bolyp, qoǵamnyń berekesin qashyra bastaǵany belgili. Dinı ekstremızm men teris aǵymdardyń aldyn alý úshin qoǵamdyq deńgeıde profılaktıkalyq jumystar asa qajet», - delingen ortalyqtyń resmı habarlamasynda.
Osyǵan oraı, aǵymdaǵy jyly 1 maýsym men 1 qazan aralyǵynda din taqyrybynda jazylǵan úzdik shyǵarmalar baıqaýy jarııalanyp otyr. Jeńimpazdardy marapattaý 18 qazan - QR Rýhanı kelisim kúni merekesi qarsańynda ótedi. Júldeniń jalpy qory - 1 000 000 teńge.
Baıqaý birneshe atalym boıynsha ótedi. Ol - «Úzdik áleýmettik beınerolık», «Úzdik tele baǵdarlama», «Úzdik radıo baǵdarlama», «Internet jelisindegi qazaq tilindegi eń úzdik materıal», «Internet jelisindegi orys tilindegi eń úzdik materıal», «Merzimdik basylymdardaǵy qazaq tilindegi eń úzdik maqala», «Merzimdik basylymdardaǵy orys tilindegi eń úzdik maqala», «Úzdik ınternet jeli», «Áleýmettik jelilerdegi eń úzdik belsendi qoǵamdyq top» jáne «Eń belsendi bloger». Basty talap - Qazaqstannyń zaıyrly memlekettik qurylymyn qarapaıym ári uǵynyqty tilmen túsindirý, memlekettik saıasattyń zańnamalyq talaptaryn uǵyndyrý, dinı ekstremıstik aǵymdardy áshkereleý, dástúr men dinniń ózara baılanysyn jetkizý, dinı ekstremızmniń aldyn alý, teris dinı toptardyń ıdeologııasy men olardyń zııandyǵyn ashyp kórsetý.
Baıqaýǵa qatysýshylar Uıymdastyrý komıtetine (Almaty qalasy, ál-Farabı dańǵyly, 71-úı, QazUÝ-dyń jýrnalıstıka fakýlteti, №218 bólme, baılanys telefony: 87775654078.
Mynadaı qujattardy qosa jiberilýi tıis:
1) jýrnalıst týraly aqparat:
- avtor týraly maǵlumat /týǵan jeri, kúni, aıy, jyly, telefon/;
- jumys isteıtin BAQ anyqtamasy.
2) baıqaý materıaly jarııalanǵan gazet-jýrnaldyń túpnusqasy, saıttaǵy materıal skrınshotpen jáne qaǵazdyq nusqasy, tele-radıo baǵdarlamalardyń DVD, CD formatyndaǵy dıskilerge jazylǵan nusqasy (qaǵazǵa túsirilgen nusqasymen birge).
