Jýrnalısterge alǵash ret «Parlament sózi» syılyǵy tapsyrylady
ASTANA. QazAqparat - Búgin QR Parlamenti Májilisiniń zań shyǵarý qyzmeti jaıynda qalam terbeıtin jýrnalısterge arnalǵan «Parlament sózi» syılyǵyna ótinimderdi qabyldaý bastaldy, dep habarlaıdy QazAqparat palatanyń baspasóz qyzmetine silteme jasap.
Ataýly syılyqqa 2016 jyldyń 1 qyrkúıegi men 2017 jyldyń 14 maýsymy aralyǵynda palatanyń zań shyǵarýshylyq qyzmeti jaıynda jaryq kórgen materıaldar qabyldanady.
Jeńimpazdar alty nomınatsııa boıynsha anyqtalady: úzdik televızııalyq, basylymdyq, ınternet jáne radıomaterıaldar, sonymen birge foto jáne beıne-materıaldar. Sondaı-aq, Qazaqstandaǵy parlamenttik jýrnalıstıkanyń damýy men órkendeýine úles qosqan BAQ ókilderi de marapattalady.
Syılyqqa úmitker kandıdattardy buqaralyq aqparat quraldarynyń basshylary, shyǵarmashylyq odaqtar, qoǵamdyq birlestikter usynady. Sondaı-aq, báıgege ózin-ózi usyný arqyly jeke jýrnalıster de qatysa alady.
Ótinimder 2017 jyldyń 15 maýsymyna deıin qabyldanady. Qosymsha aqparatty: Májilistiń resmı saıtynan nemese (8) (7172) 24-38-22 telefony arqyly alýǵa bolady.
Syılyq ıeleri Baılanys jáne aqparat qyzmetkerleriniń kúni qarsańynda jarııalanady.
Qazaqstan Respýblıkasy Parlamenti Májilisiniń Tóraǵasy Nurlan Nyǵmatýlın ótken sessııanyń aıaǵynda jýrnalısterge arnalǵan syılyq belgileý boıynsha Májilis Bıýrosynyń sheshimin jarııalaǵan bolatyn.
Aıta keteıik, «Parlament sózi» syılyǵy bıyl alǵash ret tapsyrylǵaly otyr.
