Jýrnalısterdiń mártebesin zań arqyly aıqyndaıtyn ýaqyt jetti - I. Elekeev
ASTANA. 29 maýsym. QazAqparat /Qanat Mámetqazyuly/ - Jýrnalısterdiń mártebesin zań arqyly aıqyndaıtyn ýaqyt jetti. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Irak Elekeev osylaı málimdedi.
«Bizdiń qoǵamda jýrnalısterge qurmet kórsetý tek qana Baspasóz kúnimen shekteletin sııaqty. Elbasy Nursultan Nazarbaevtyń belgilep berýiniń arqasynda maýsymnyń sońǵy jeksenbisi Baspasóz kúni bolyp atalyp júr. Ol eshqandaı zańmen bekitilmegen. Jýrnalıster halyqtyń barlyq áleýmettik jaǵdaıyn kóteredi. Alaıda ózderiniń ash-jalańash júrgenine bizdiń qoǵam mán bermeıdi. Baspasóz kúnine oraı taıaýda Astana ákimshiligi bir jýrnalıstke páter berdi jáne «Nur Otan» partııasy uıymdastyrǵan baıqaý jeńimpazy retinde bir jýrnalıstke páter berildi. Al myńdaǵan jýrnalıster pátersiz, úı jaldap, tapqan aqshalaryn solardyń qaltasyna salyp, bireýdiń bosaǵasynda júr»,- dedi depýtat.
Sonymen qatar I. Elekeev jaqynda L.Gýmılev atyndaǵy Eýrazııa ulttyq ýnıversıtetinde Qazaqstan jýrnalıstıkasynyń ózekti máselelerine arnalǵan dóńgelek ústel ótkenin, oǵan elimizdegi buqaralyq aqparat quraldarynyń basshylary men jetekshi jýrnalıster qatysyp, qazirgi jýrnalıstıkanyń asa mańyzdy máseleleri sóz bolǵanyn aıtty. «Sol otyrysta qalamgerler jýrnalısterdiń áleýmettik, memlekettik, ákimshilik qyzmetshiler tarapyna jatpaıtynyn, soǵan oraı mártebeleri aıqyndalmaı kele jatqanyn ashyq aıtyldy. Osy máseleni zań túrinde sheshetin ýaqyt jetti dep oılaımyn. «Turǵyn úı qatynastary týraly» zańǵa túzetýler engizilip, jýrnalısterge de páter alýda jeńildikter qarastyrylǵany jón. Osy kóterilgen máselelerdiń zań túrinde sheshilýine yqpal etýińizdi suraımyn»,- dedi depýtat Irak Elekeev.
