Jýrnalısterdiń kásibı biliktiliginiń arqasynda halyqtyń aqparattaný deńgeıi artýda - Aqmola oblysynyń ákimi (FOTO)
KÓKShETAÝ. QazAqparat - Búgin 28 maýsym - Baılanys jáne aqparat qyzmetkerleri kúni Aqmola oblysynyń ákimi Sergeı Kýlagın respýblıkalyq jáne jergilikti BAQ ókilderin quttyqtady.
Saltanatty shara barysynda BAQ ókilderi arasynda ótken oblystyq «Altyn qalam» baıqaýynyń qorytyndysy shyǵarylyp, eń úzdikteri marapattaldy.
Osy rette aımaq basshysy jýrnalıster qaýymynyń elimizdiń, oblysymyzdyń damyp, órkendeýine qosyp kele jatqan úlesteri orasan zor ekenin atap ótti.
«Sizderdiń kásibı joǵary biliktilikterińiz ben óz isterińizge degen adaldyqtaryńyzdyń arqasynda halyqtyń aqparattaný deńgeıi artyp, adamdardyń bir-birimen baılanys aıasy keńeıýde.
Bıylǵy jyly Qazaqstan óz táýelsizdiginiń 25 jyldyǵyn atap ótkeli otyr. Osy shırek ǵasyr ýaqyttyń ishinde elimiz aýyz toltyryp aıtarlyqtaı kóptegen jetistikterge qol jetkizdi jáne sol jetistikterde sizderdiń de qosqan qomaqty úlesterińiz bar. Sizderdiń talanttaryńyz ben iskerlikterińiz, joǵary moraldyq ustanymdaryńyz Memleket basshysy alǵa qoıǵan bıik mindetterdi júzege asyryp, Otanymyzdyń gúldenip órkendeýine odan ári de kómektese beredi dep senemin», - dedi oblys ákimi quttyqtaý sózinde.
Saltanatty shara barysynda, «Altyn qalam» baıqaýynyń qorytyndysy shyǵaryldy. Oǵan oblystaǵy respýblıkalyq jáne jergilikti BAQ ókilderi men ardager jýrnalıster birneshe nomınatsııa boıynsha qatysty. Baıqaý kezinde televızııa, baspasóz jáne elektrondy BAQ salasyndaǵy eń úzdik degen shyǵarmashylyq jumystar tańdalyp alyndy.
Baıqaý jeńimpazdary oblys ákiminiń Alǵys haty, dıplom jáne baǵaly syılyqtarmen marapattaldy.
