Jýrnalısterdiń ekonomıkalyq bilimin kóterý kerek - Saǵadıev
ASTANA. QazAqparat - Memleket basshysynyń úshinshi jańǵyrýǵa arnalǵan bıylǵy Joldaýy aıasynda jýrnalıst mamandardyń ekonomıkalyq bilimin kúsheıtý kerek, dep málim etti QR Bilim jáne ǵylym mınıstri Erlan Saǵadıev. Bul týraly QazAqparat tilshisi habarlaıdy.
«Árıne, jýrnalısterdiń ekonomıkalyq bilimin kóterý kerek. Sebebi bıylǵy Joldaý aıasyndaǵy barlyq sharalardy xalyqqa túsinikti tilde jetkizgen asa mańyzdy. Ol - bir. Ekinshiden, qarapaıym xalyqtyń ekonomıkany jaqsy bilgeni sol ekonomıkanyń ózine de paıdaly. Sondyqtan buqaralyq aqparat quraldary salasyndaǵy mamandardyń ekonomıka boıynsha arnaıy bilimderin kúsheıtken jón», - dedi Saǵadıev QazAqparat tilshisine bergen suxbatynda.
Al «Jýrnalısterdi daıarlaý jaǵynan qandaı da bir ózgeris bola ma?» degen suraqqa mınıstr: «Árıne. Olarǵa arnaıy kýrstardy engizemiz. Sosyn bizde akademııalyq erkindik aıasynda joǵary oqý oryndaryna oqý baǵdarlamalaryn ózgertýge múmkindik beriledi. Olar ózdigimen maman daıarlaý júıesin túzete alady», - dep jaýap berdi.
Aıta keteıik, QR Aqparat jáne kommýnıkatsııalar mınıstrliginiń keńeıtilgen alqa májilisinde mınıstr Dáýren Abaev ta saraptamalyq jýrnalıstıkany damytý máselesine basa nazar aýdarǵan bolatyn. Sebebi qazaqstandyqtar tele-radıo salasynda kásibı jýrnalısterdiń tapshylyǵy máselesin jıi kóteredi. Al baspasózde saraptamalyq materıaldar az. «Ústimizdegi jyly memlekettik aqparat quraldary aldynda birqatar mindetter tur. Eń aldymen saraptamaǵa, taldaý materıaldaryna kóptep kóńil bólý kerek. Óıtkeni búgingi tańda aqparat óte tez taratylady. Sondyqtan sol aqparattardyń mazmuny men sapasy saı bolýy tıis», - dep atap kórsetti Abaev.
