Jýrnalısterdi baspanamen qamtamasyz etý kezek kúttirmes saıası-áleýmettik mańyzdy másele - N. Orazalın
«Qazaqstan jurtshylyǵyna rýhanı qyzmet kórsetip, respýblıka kóleminde bolyp jatqan jańalyqtar men aqparattardyń der kezinde taraýyna, sonymen qatar, saǵat-sát saıyn ózgerip turǵan jahandaný jaǵdaıyndaǵy ár alýan dúnıelik qubylystardy taný, taldaý sıpatynda qomaqty mindet atqaryp júrgen jýrnalıster qaýymynyń qoǵamdaǵy orny arta túsýde. Bul dálelsiz shyndyq», - deıdi depýtat N. Orazalın. Onyń aıtýynsha, qazir elimizde 252 elektrondyq BAQ, 146 teleradıo kompanııasy, 88 telekompanııa, 58 radıokompanııa, 98 kabeldi operator, 1364 gazet, 522 jurnal, 64 aqparattyq agenttik jumys jasaıdy. Bul rette depýtat osynshama aqparat quraldarynda qansha jýrnalıst jumys isteıtindigi, olardyń qanshalyqty áleýmettik qamsyzdandyrylǵany, baspanamen qanshasy qamtylǵany týraly aqparattyń joq ekendigin atap ótti.
«Táýelsiz Qazaqstannyń yntymaǵy men birligine, Elbasy júrgizip otyrǵan reformalardyń júzege asýyna, el ómirindegi saıası turaqtylyq pen rýhanı túleýdiń baıandy bolýyna óz úlesin qosyp kele jatqan qalamger qaýymyn, sol sanattaǵy BAQ ókilderin, ásirese memlekettik arnalarda qyzmet jasaıtyn jas jýrnalısterdi baspanamen qamtamasyz etý kezek kúttirmes saıası-áleýmettik mańyzdy máselege aınalyp otyr», - dedi senator.
Sonymen qatar, N. Orazalın kópshilik jýrnalısterdiń, sonyń ishinde jas otbasyn qurǵan qalamgerlerdiń turmystyq-áleýmettik jaǵdaıy kóńil kónshirlik emes ekenin, olardyń basym bóligi páter jaldap turatynyn alǵa tartty.
«Jalǵyz jýrnalıster ǵana emes, búgingi kúni óner men ádebıettiń biraz ókilderi osyndaı páter tapshylyǵynyń taýqymetin tartyp otyr. Sondyqtan da, Úkimet arnaıy baǵdarlama ázirlep, memlekettik BAQ qyzmetkerleri men ádebıet, óner salasyndaǵy daryndy jastar úshin qyzmettik turǵyn salý múmkindigin qarastyrǵan jón bolar edi. Úkimettiń «Qoljetimdi baspana-2020» baǵdarlamasynyń baspanaǵa muqtaj azamattardy tolyǵymen qamtý múmkindigi shekteýli. Osy oraıda, tym bolmasa jýrnalısterge, óner men ádebıet salasyndaǵy daryndy jastarǵa Astana qalasynan memleket esebinen arnaıy jatahqana qalashyǵyn salý isi qolǵa alynsa, olardyń basyndaǵy turmystyq-áleýmettik qıyndyqtary edáýir jeńilder edi», - dedi senator.
