Jýrnalısterdi is-sharaǵa akkredıtatsııalaýdyń basqa da formalaryna qarsy emespiz – Aıda Balaeva

Mádenıet jáne aqparat mınıstrligi jýrnalısterdi túrli is-sharaǵa akkredıtatsııalaýdyń basqa da formalaryn engizýge qarsy emes. Bul týraly atalǵan vedomstvonyń basshysy Aıda Balaeva aıtty, dep habarlaıdy Kazinform.

«Jýrnalısterdi túrli is-sharalarǵa qatysýǵa akkredıtatsııalaýdy avtomatty túrde jasaý úshin arnaıy press-karta engizý usynylady. Búginde bul novella qyzý talqylanýda, oǵan qatysty medıa qaýymdastyq ókilderi men jumys toby músheleriniń pikiri eki jaqty boldy. Bul máseledegi bizdiń basty maqsatymyz – akkredıtteý protsesterin avtomattandyrý. Al ony júzege asyrýdyń basqa da formalaryna mınıstrlik jalpy qarsy emes ekenin aıta ketkim keledi», - dedi mınıstr Ortalyq kommýnıkatsııalar qyzmetindegi «Mass-medıa týraly» zań normalaryn túsindirýge arnalǵan brıfıngte.

Osy oraıda ol Májilis depýtattary bastamashylyq etken normalarǵa jeke toqtalyp ótti.

«Máselen, depýtattar memlekettik tildiń mártebesin nyǵaıtýǵa jáne onyń úlesin 50-den 70 paıyzǵa deıin kezeń-kezeńimen ulǵaıtý arqyly otandyq kontentti damytýǵa baǵyttalǵan birqatar júıeli sharalardy usyndy. Alaıda sala ókilderiniń pikirin eskere otyryp, mınıstrlik kezeń-kezeńimen kóshýdi usynady. Depýtattar usynǵan jańashyldyqtar sheteldik tele-radıo baǵdarlamalardyń retranslıatsııasyn 20-dan 10 paıyzǵa deıin tómendetýge, sondaı-aq óńirlik jáne balalarǵa arnalǵan BAQ-ty qoldaýdyń birqatar standartyna da qatysty bolyp otyr. Qazir depýtattar usynǵan túzetýler jumys tobynyń otyrystarynda talqylanýda», - dedi Aıda Balaeva.