Jýrnalıster jaǵymsyz aqparatty nege kóp beredi
«Máselen, kúni keshe bizde baspasóz máslıhaty ótti. Sol jerde bes aıdyń qorytyndysy jarııalanǵan bolatyn. Biraz másele jemqorlyqtyń aldyn alý sharalaryna arnaldy. Biraq buqaralyq aqparat quraldary onyń bárin bergen joq. Jemqorlyq úshin kim ustaldy? Qalaı ustaldy? Sony ǵana berdi. Aqparattyq agenttikterdiń bári solaı istedi. Menińshe, búginde profılaktıkalyq sharalardy da keńinen nasıhattaýymyz qajet», - dedi A.Shpekbaev QR Prezıdenti janyndaǵy Adam quqyqtary boıynsha komıssııanyń keńeıtilgen otyrysynda.
QR Aqparat jáne kommýnıkatsııalar mınıstri Dáýren Abaev atalǵan úrdistiń negizgi sebebin túsindirdi. «Ókinishke qaraı, ondaı másele bar. Mysaly, qazir biz memlekettik qyzmetshiniń adal eńbek atqarǵany úshin syıaqy alǵanyn jazsaq, ony ary ketse, 200-aq adam oqıdy. Al memlekettik qyzmetshiniń paramen ustalǵanyn 10 000 adam oqyp shyǵady. Al buqaralyq aqparat quraldary jarnamany kóptep tartyp, aqsha tabýǵa tyrysady. Jańalyqty adam neǵurlym kóp oqysa, soǵurlym jarnama da kóp túsedi. Sol sebepti jýrnalıster jaǵymsyz jańalyqtardy kóp beredi», - dep atap kórsetti D.Abaev.
Aıta keteıik, otyrys barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev adal jumys isteıtin memqyzmetshilerdiń sanyn jarııalady. Agenttik basshysy iri kólemde para berý qylmystarynyń kóbeıip jatqanyn da jetkizdi.