Jýrnalıster ultty órkenıetke jeteleıtin shamshyraq bolýy kerek — Prezıdent
ASTANA. KAZINFORM — Búgingi jýrnalıster ultty órkenıetke jeteleıtin aǵartýshylyq joldaǵy shamshyraq bolýy kerek. Bul pikirdi Memleket basshysy Qasym-Jomart Toqaev Aqordada BAQ ókilderin marapattaý rásiminde aıtty.
Qasym-Jomart Toqaev sán-saltanatty ómir men «jeńil aqsha» kýltin dáripteý durys emes dep sanaıtynyn jetkizdi.
— Óıtkeni bul óskeleń urpaqty adastyryp, olardyń dúnıetanym qundylyqtary men ómirlik muratyna teris yqpal etedi. Jastar medıakeńistikten ysyrapshyldyq pen mánsiz yrdý-dyrdýǵa toly aldamshy ómirdi emes, kerisinshe, jasampaz eńbektiń, adal tabystyń, ishki mádenıettiń naǵyz úlgisin kórýi kerek. Búgingi jýrnalıster eki mańyzdy róldi qosa atqarýǵa tıis: ıaǵnı olar shyndyqty boıamasyz kórsetetin aına, sonymen qatar ultty órkenıetke jeteleıtin aǵartýshylyq joldaǵy shamshyraq bolýy kerek, — dedi Memleket basshysy.
Prezıdenttiń aıtýynsha, qazir elimiz birtutas ult bolyp, órkendegen, zamanaýı, ıaǵnı ozyq memleket quryp jatyr. Biraq bul — tól qundylyqtarymyzdy umytý degen uǵym emes.
— Biz jurtymyzǵa tán ıgi qasıetterdi jańǵyrta túsýimiz kerek. Muny azamattarymyz, ásirese, jastarymyz tereń túsinýi qajet. Mádenıeti joǵary eldiń álemdegi mártebesi de, bedeli de bıik bolary aıqyn. Al naǵyz mádenıet úıde de, túzde de ádep saqtaý, kópshilik ortada ózin durys ustaý, basqa adamdardy qurmetteý, syılaý sııaqty qarapaıym qaǵıdalardan bastalady. Qazaq halqy ádepten attamaǵan, árdaıym úlkenge qurmet, kishige izet kórsete bilgen. Jaqynyna janashyr kózben qarap, jyǵylǵanǵa demeý, súringenge súıeý bolǵan. Bizdiń shynaıy bolmysymyz — osy. Sondyqtan adamnyń ar-namysyna nuqsan keltiretin, qaýipsizdigine qater tóndiretin kez kelgen áreketke jol bermeý qajet, — dedi Qasym-Jomart Toqaev.
Sonymen birge, ozyq el retinde qoǵamda salt-dástúrimizge negizdelgen órkenıetti etıkalyq normalardy ornyqtyra túsý kerek. Osy baǵyttaǵy jumysty kúsheıtý — aıryqsha mańyzy bar mindet.
— «Qalam eldi túzeıdi» degen sóz beker aıtylmaǵan. Osy oraıda, biz sizderge — jýrnalıster qaýymyna zor úmit artamyz. Aqparat salasynyń qyzmetkerleri qashanda ult sapasyn jaqsartatyn qundylyqtardy dáripteý isine belsene atsalysýy qajet dep sanaımyn, — dedi Prezıdent.
Aıta keteıik, 28 maýsym — BAQ ókilderiniń kásibı merekesi qarsańynda Memleket basshysy Qasym-Jomart Toqaev jýrnalıster qaýymyn quttyqtady.
Eske sala ketsek, 2019 jyly Prezıdent Qasym-Jomart Toqaev jýrnalısterdiń kásibı merekesin bekitý jóninde Úkimetke tapsyrma bergen bolatyn. Úkimettiń tıisti Qaýlysy jarııalanyp, 28 maýsym kúni Buqaralyq aqparat quraldary qyzmetkerleriniń merekesi atalyp ótetin boldy.
