Jýrnalıster Turǵyn úı qurylys bankindegi salymdar boıynsha 6-orynda tur
ALMATY. QazAqparat - «Turǵyn úı qurylys jınaq banki» AQ salymshylarynyń arasynda jýrnalıster altynshy orynda tur. Bul týraly Baılanys jáne aqparat qyzmetkerleri kúnimen quttyqtaý barysynda banktiń basqarma tóraıymy Lázzat Ibragımova aıtty, dep habarlaıdy QazAqparat tilshisi.
«2018 jyldyń alǵashqy 5 aıy ishinde bank 12912 nesıe bergen. Bul jalpy Qazaqstandaǵy ıpotekanyń 80 %-y desek bolady. Tek jumys kúnderin esepke alsaq, kún saıyn orta eseppen shamamen 130 qazaqstandyq qonys toıyn toılaıdy eken. Olardyń arasynda jýrnalıster de bar. Bizdiń banktiń klıenti atanǵan jýrnalıster turǵyn úı jınaǵy júıesin óz tájirıbelerinen ótkizip, endi bizdiń otandastarymyzǵa úı alýdyń qoljetimdi joldary týraly aqparatty jetkizýge kómektesýde», - dedi Lázzat Ibragımova.
Osy ýaqytqa deıin 15 jylda «Turǵyn úı qurylys jınaq banki» AQ 147 302 otbasyna baspana jaǵdaıyn jaqsartýǵa kómektesken.
Olardyń 88 %-y úıdi satyp alýǵa tyryssa, qalǵany úıin jóndeýge alǵan.
Búginde 1 mln 118 myń 525 adam óziniń 546 mlrd teńgesin Turǵyn úı qurylys jınaq bankinde saqtap otyr. Bul - eldegi ekonomıkalyq turǵydan belsendi halyqtyń 12,8 %-y. Bes jyl buryn atalǵan kórsetkish 7,1 %-ǵa teń bolǵan.
