Jýrnalıster mınıstrlerdiń artynan júgirmese de bolady - OKQ
ASTANA. QazAqparat - QR Aqparat jáne kommýnıkatsııalar mınıstrligi janyndaǵy Ortalyq kommýnıkatsııalar qyzmeti jumysynyń formatyn taǵy da jańartty. Endi, atalǵan qyzmettiń resmı ókili Murat Jumanbaıdyń el oqıǵalaryna qatysty baıandamasynan keıin árbir mınıstrliktiń baspasóz xatshylary jýrnalısterdiń kókeıinde júrgen suraqtarǵa jaýap beretin bolady, dep habarlaıdy QazAqparat tilshisi.
Búgingi brıfıngke Іshki ister mınıstrligi, Din jáne azamattyq qoǵam isteri jónindegi mınıstrlik, Bilim jáne ǵylym mınıstrligi, sondaı-aq Syrtqy ister mınıstrliginiń baspasóz xatshylary kelmedi. Degenmen, baspasóz máslıxatyna qatysqan xatshylardyń daıyndyǵy tıisti deńgeıde bolǵan joq. Sebebi jýrnalıster olardyń jaýaptarynan tuşymdy aqparat shyǵara almady. Máselen, Qorǵanys mınıstrliginiń aqparat jáne kommýnıkatsııalar departamenti basshysynyń orynbasary Qaıyrgeldi Qusaıynov qar kóshkini kezinde sarbazdardyń qaıtys bolýyna baılanysty tergeýdiń barysy jaıynda aıtyp berdi. «Shyny kerek, bul - úlken tragedııa. Menińshe, komıssııaǵa engen adamdardyń barlyǵy bilikti mamandar. Qazirgi kezde aldyn ala eshteńe aıta almaımyn. Komıssııanyń ózi tıisti baǵasyn beredi», - dedi Qusaıynov. Sondaı-aq ol kólikti mas kúıide júrgizgen áskerı polıtsııa qyzmetkeriniń jumystan qýylǵanyn jetkizdi. Osydan keıin Energetıka mınıstrliginiń, sondaı-aq Mádenıet jáne sport mınıstrliginiń ókiline suraq qoıyldy. Alaıda eki vedomstvonyń ókilderi atalǵan suraqtardyń keıin jaýap berýdi surady.
«Bizdiń negizgi maqsatymyz - tolyqqandy aqparat berý. Jýrnalıster mınıstrlerdiń artynan júgirmeıtindeı, kókeılerinde júrgen suraqtarǵa osy jerden birden jaýap alatyndaı brıfıngterdi osy formatta ótkizýdi qolǵa alyp otyrmyz. Endi, árbir dúısenbi saıyn baspasóz xatshylary osynda kelip, barlyq suraqtarǵa jaýap beretin bolady. Vedomstvonyń baspasóz xatshysy men resmı ókili qyzmetteri sol úshin engizilgen. Olar ózderi jumys isteıtin memlekettik organnyń resmı ustanymyn bildirýi tıis. Búgin daıyndyqtary durys bolmady. Kelesi joly baspasóz xatshylarynan daıyndalyp kelýdi suraımyn», - dedi Murat Jumanbaı. Onyń aıtýynsha, Ulttyq qaýipsizdik komıteti men Bas prokýratýranyń baspasóz xatshylaryna tıisti shaqyrý jiberiledi. Alaıda olardyń jańa formattaǵy brıfıngterge qatysýy-qatyspaýy áli belgisiz.
