Jýrnalıster memorgandardyń qymbat jıhaz satyp alýyna tosqaýyl qoıdy

NUR-SULTAN. QazAqparat - Memleket basshysynyń moratorııinen keıin memlekettik organdardyń qymbat jıhaz satyp alý faktileri tirkelgen joq. Bul týraly QR Qarjy mınıstrligi Memlekettik satyp alýlar zańnamasy departamentiniń dırektory Sábıt Ahmetov aıtty, dep habarlaıdy QazAqparat tilshisi.

«Búgingi kúni qymbat jıhaz satyp alýǵa qatysty ondaı mysaldar joq. Óıtkeni, avtokólik sııaqty jıhazdardy satyp alýǵa da moratorıı jarııalanǵan. Degenmen, moratorıı belgilengenge deıin, osy normatıvtik-quqyqtyq aktiler shyqqanǵa deıin satyp alynǵan jıhazdar bar», - dedi ol Ortalyq kommýnıkatsııalar qyzmetindegi baspasóz máslıhatynda.

Sonymen qatar departament dırektory buqaralyq aqparat quraldarynda jarııalanymdar memlekettik organdardyń qymbat jıhaz satyp alýyna tosqaýyl bola alǵandyǵyn da aıtty.

«Qazirgi ýaqytta árbir jaıtqa qatysty buqaralyq aqparat quraldarynyń dereý ún qatyp, satyp alýlarǵa monıtorıng jasap otyratyndyǵy qýantady. Bıýdjettik baǵdarlamalardyń basym bóligi BAQ-ta jarııalanym shyqqannan keıin óz erikterimen satyp alýlardan bas tartyp, tenderdi alyp tastap jatyr», - dedi Sábıt Ahmetov.