Jýrnalıster qara bazardy tekserý úshin adamnyń eki bas súıegin satyp alǵan
ASTANA. QazAqparat - Reıter agenttiginiń eki reporteri AQSh-taǵy adam deneleri saýdasyn qyr-syryn zertteý maqsatynda ólgen adamnyń eki bas súıegi men omyrtqa jotasyna tapsyrys bergen.
Bul jaıly Reıter agenttiginiń resmı saıtynda keshe jarııalanǵan maqalada aıtylady.
Aqparat agenttigi adam denesiniń múshelerin satyp alýdyń qanshalyqty ońaı ekenin, olardy medıtsınada paıdalanýǵa jaramdylyǵyn anyqtaý úshin osyndaı áreketke barǵan. Alaıda Restore Life agenttiginen bastyń árbirin nebári 300 AQSh dollaryna ońaı ǵana satyp alǵanyna tilshiler - Braıan Groý men Djon Shıffmannyń ózderi de qatty tańǵalǵan.
Jýrnalısterdiń aıtýynsha, dene múshelerin satý da, satyp alý da eshqandaı zańǵa qaıshy kelmegen. Osy oraıda bir aıta keterligi, adam dene múshelerin saýdalaýǵa AQSh zańdary «jumsaq kózben» qaraıdy, degenmen keıbir shtattarda dene saýdasyna zańmen qatań tyıym salynǵan. Onyń ústine, elde bul salany zańgerler, ǵalymdar, memlekettik bılik ókilderi qatań qadaǵalaýda ustaıdy. Ári dene múshelerin satyp alýdyń aldynda zańnamalyq, etıkalyq jáne qaýipsizdik máseleleri jaıyn keńesý úshin Mınnesota ýnıversıtetiniń Medıtsına mektebindegi dene músheleri donorlyǵy baǵdarlamasynyń jetekshisi Angela MakArtýrǵa júginedi.
Dene músheleri saýdagerlerimen kelisim jasasýǵa tikeleı ózi qatysqan MakArtýrdyń ózi de dene saýdasynyń munshalyqty ońaı bolǵanyna tańdanysyn jasyra almady. «Men buryn mundaıdy kórmegenmin. Adamnyń basyn bulaı ońaı ǵana satyp alýǵa bolatyny jaıly tipti bilmeıdi de ekenmin. Biraq bul organdar medıtsınalyq maqsatta paıdalanýǵa jaramsyz. Máıitti jerleýmen aınalysatyn uıymdardyń da qyzmetine alańdaýshylyq paıda boldy mende», - deıdi professor.
Jerleý bıýrolarynyń biriniń sózine sensek, qaıtys bolǵan týysyn jerleýge qarjy tappaǵan adamdar erikti túrde olarǵa habarlasyp, máıitti satyp jiberedi eken.
Agenttiktiń esepteýlerine qaraǵanda, AQSh-ta 2011-2015 jyldar aralyǵynda saýdagerler 50 myń máıit jáne 182 myń dene múshesin saýdalaǵan. Qazir Amerıkada tutastaı adamnyń máıitin 3-5 myń dollar tóńireginde, al jekelegen múshelerdi birneshe júz dollarǵa satyp alýǵa bolady.
