Jýrnalıster Hummer jáne Cobra brondy tehnıkasyn júrgizip kórdi (FOTO)
ASTANA. QazAqparat - Tanymal ınternet-basylymdardyń jýrnalısterine Qazaqstan Armııasynyń avtomobılderin qozǵalý kezinde baǵalaý, mashınanyń júrisin seziný, tegis jáne jolsyz jolda onyń qabileti men qozǵalysyn tekserýge erekshe múmkindik jasaldy, dep habarlady QR Qorǵanys mınıstrliginen.
Tilshiler brondy tehnıkanyń Hummer jáne Cobra eki modelin testiledi jáne olardyń beriktik deńgeıine shynaıy jaǵdaıda kóz jetkizdi.
Jýrnalıster áskerıler jattyǵyp jatqan Astana mańyndaǵy 68665 áskerı bóliminiń oqý-jattyǵý bazasynda boldy. Test-draıvty ótkizý kezinde avtomobıldiń tehnıkalyq sıpattamalaryna ǵana emes, otyrǵyzý kezinde jáne tolyq jaýyngerlik jaraqtandyrýda ekıpaj músheleri ózderin qalaı sezinetinine nazar aýdaryldy.
Kobra (Cobra) bronetransporteri - «Otocar» túrik kompanııasynyń kóp nysanaly jeńil quryshtalǵan dóńgelekti mashınasy. Mashınanyń qoraby qańqaly syzba boıynsha oryndalǵan. Oǵan brondaý elementteri, kúshtik qurylǵy jáne transmıssııa bekitiledi. Brondaý dárejesi 7,62 mm deıingi kalıbrli atys qarýynyń atysy men jarylǵysh qurylǵylardyń zaqymdaýshy elementterinen ekıpaj ben tasymaldanatyn jeke quramdy qorǵaýdy qamtamasyz etedi. Bul STANAG 4569 toptastyrylýy boıynsha qorǵaýdyń 1-deńgeıine sáıkes keledi. Mashınanyń borttary men korpýstyń artqy bóliginde baqylaý aspaptary men atys sańylaýy ornalasqan. Ol arqyly desant jeke qarýynan atysty júrgize alady. Jýrnalıster testileýden ótkizgen ekinshi brondy tehnıka Hummer ekstremaldi dóńgelekti brondy transporter boldy. Avtomobıl senimdi, joǵary ótimdi, tózimdi jáne ámbebap bolyp tabylady. Bul ony azamattyq sektorda da paıdalanýǵa múmkindik beredi. Qazirgi kezde HUMMER - álemdegi eń úlken jol tańdamaıtyn kólik.
