Jýrnalıster beıbit mıtıng kezinde qalaı jumys isteý kerek – mınıstr buıryǵy
ASTANA. KAZINFORM – Mádenıet jáne aqparat mınıstriniń 2025 jylǵy 1 sáýirdegi buıryǵymen beıbit sherýge qatysatyn jýrnalıstiń (buqaralyq aqparat quraldary ókili) qyzmetin júzege asyrý qaǵıdalary bekitildi.
Mınıstrliktiń bıyl 15 sáýirden bastap kúshine enetin buıryǵyna sáıkes, beıbit jınalystarda aqparat jınaý, óńdeý, habar jáne materıal daıyndaý kezinde jýrnalıst ózimen birge qyzmettik kýáligin alyp júrýge jáne arnaıy kıim kııýge mindetti.
Naqty aıtqanda:
– habarlar men materıaldardy jınaý, óńdeý jáne daıyndaýdy júzege asyrady, aqparatty suratady, alady jáne taratady;
– kólik qozǵalysyna, ınfraqurylym nysandarynyń jumysyna, múliktiń saqtalýyna kedergi keltiretin, sondaı-aq beıbit jınalysqa qatyspaıtyn azamattardyń erkin qozǵalysyna tosqaýyl bolatyn áreketter jasamaıdy;
– beıbit jınalystar uıymdastyrýshysynyń, qatysýshylarynyń jáne memlekettik organdar men uıym qyzmetkerleriniń zańdy áreketterine kedergi jasamaıdy.
Jýrnalısterdiń kásibı qyzmetin qamtamasyz etý maqsatynda jergilikti atqarýshy organ buqaralyq aqparat quraldarynyń suranysy boıynsha jedel baspasóz ortalyǵymen qamtamasyz etedi.
Jedel baspasóz ortalyǵy kelesi talaptarǵa sáıkes bolýy tıis:
– arnaıy qorshalýy;
– foto, vıdeoǵa túsirý jáne suhbat alý múmkindigin qamtamasyz etý;
– elektr qýatymen qamtamasyz etilýi;
– ómiri men densaýlyǵyna qaýip tóngen jaǵdaıda ishki ister organdary qyzmetkerleriniń jedel áreket etýi arqyly jýrnalısterdiń qaýipsizdigin qamtamasyz etýi.
Jýrnalıst beıbit jınalystarda aqparat jınaý, óńdeý, daıyndaý qyzmetin jedel baspasóz ortalyǵy aýmaǵynda da, odan tys jerlerde de júzege asyra alady.
Sondaı-aq jergilikti atqarýshy organ beıbit jınalys kezinde óz ókiliniń qatysýyn qamtamasyz etedi. Ol jýrnalısterdi jedel baspasóz ortalyǵyna ertip barý, uıymdastyrýshylar men qatysýshylardan suhbat, túsinikteme alýǵa kómektesý, sondaı-aq jýrnalısterdiń qaýipsizdigin qamtamasyz etýge baǵyttalǵan sharalardy túsindirý jumystaryn júrgizýge jaýapty.
Jýrnalısterdiń beıbit jıyndaǵy formasy:
– Ashyq kók tústi jılet;
– Belgileıtin tańǵysh (qolǵa taǵady);
– Japsyrma (keýdeshe).
Atalǵan aıyrym belgilerin kıgen kezde olardyń anyq kórinýi qamtamasyz etilýi qajet.
Jılette kóldeneńinen eni keminde 20 mıllımetr bolatyn jolaq tigiledi (aldynda jáne arqasynda). Sol jolaqtardyń ústińgi bóliginde «PRESS» degen jazý ornalastyrylady. Jazý latyn áripterimen, Arial qarpimen, aq nemese kúmis tústi shaǵylystyrǵysh matadan jasalady. Tańǵysh – ashyq sary tústi, ústinde «PRESS» degen jazý bolady.
Eske sala ketsek, Memleket basshysy Qasym-Jomart Toqaev 2022 jylǵy Qańtar oqıǵasy jaıly: «Beıbit sherý men qaraqshylardyń qandy qylmysynyń arasyn ajyrata bilý kerek» degen edi.