Jýrnalıster arasynda Seıdahmet Berdiqulov atyndaǵy týrnır ótip jatyr
ASTANA. QazAqparat - Búgin Astanada «Sport» kúnine oraı QR Mádenıet jáne sport mınıstirliginiń uıymdastyrýymen BAQ ókilderi arasynda shaǵyn fýtboldan Seıdahmet Berdiqulovty eske alýǵa arnalǵan týrnır ótip jatyr, dep habarlaıdy QazAqparat tilshisi.
Atalǵan týrnırge elimizdiń BAQ salasynda qyzmet etip júrgen tilshiler qaýymynan quralǵan jalpy 22 komanda qatysýda.
Esterińizge sala keteıik, qazaq sport jýrnalıstıkasynyń kórnekti ókili Seıdahmet Berdiqulovty eske alýǵa arnalǵan shaǵyn fýtbol týrnıri jyl saıyn jýrnalıster arasynda ótedi. Bıyl osymen 20-shy ret uıymdastyrylyp otyr.
Sondaı-aq týrnır aıasynda jyl saıynǵy Seıdahmet Berdiqulov atyndaǵy syılyqtyń jeńimpazdaryna syılyqtar tabystalady. Bıyl júldeni Almaty oblystyq «Jetisý» gazetiniń sport tilshisi Rıshad Turǵanbaev pen «Ońtústik Qazaqstan» gazetiniń tilshisi Ǵabıt Saparbek jeńip alǵan bolatyn.
Aıta keteıik, Seıdahmet Berdiqulov 1933 jyldyń 9 mamyrynda Almaty oblysy, Jambyl aýdanyndaǵy Qaraqastek qystaǵynda dúnıege kelgen. Qazaqstandaǵy sport juldyzdarynyń tabystaryn nasıhattaýǵa eńbek sińirgen. 1956 jyly QazMÝ-diń jýrnalıstıka fakýltetin bitirgen. 1965 - 1970 jyldary «Qazaqstan pıoneri» basylymynyń redaktory. 1970 - 1986 jyldary «Lenınshil jas» (qazirgi «Jas alash») gazetiniń redaktory, 1986 - 1994 jyldary «Jalyn», «Balaýsa» baspalarynyń dırektory bolǵan. «Sol oramal joǵalmaıdy» (1965), «Júrek uıyqtaýdy bilmeıdi» (1967), «Egeýli naıza» (1969), «Jumyr jerde teńbil dop» (1969), «Aspannan shuǵa jaýǵan kún» (1975), «Muńaıyp oıanǵan qala» (1979), «№3 podezd» (1980), «Perdesiz kóńil» (1983), «Arbaǵan máni bir sıqyr» (1987) syndy shyǵarmalardyń avtory.
