Jýrnalıster arasynda Seıdahmet Berdiqulov atyndaǵy baıqaý jarııalandy
ASTANA. QazAqparat - Qazaqstannyń BAQ jýrnalısteri arasynda sport jýrnalısi, pýblıtsıst jáne qoǵam qaıratkeri Seıdahmet Berdiqulov atyndaǵy jyl saıyn ótetin baıqaý bastaldy, dep habarlaıdy QR Mádenıet jáne sport mınıstrliginiń Sport jáne dene shynyqtyrý isteri komıtetinen.
Syılyq jylyna bir ret úsh jeńimpazǵa tapsyrylady. Onyń ishinde eki syılyq - memlekettik tildiń mártebesin kóterý maqsatynda qazaq tilinde jarııalanǵan materıaldarǵa, bir syılyq - orys tilinde jarııalanǵan materıaldarǵa belgilengen.
Úmitkerler Álem jáne Azııa chempıonattaryna, Álem Kýboktaryna, mártebeli halyqaralyq jarystarǵa jáne Qazaqstan birinshilikterine arnalǵan jarııalanymdar (ocherkter, maqalalar, taldaý, teletranslıatsııalar, telekópirler jáne t.b.), qazaqstandyq BAQ-ta buqaralyq sportty, balalar men jasóspirimder arasyndaǵy sportty, múgedekter arasyndaǵy jáne ulttyq sport túrlerinen sport oıyndaryn (spartakıadalar, týrnırler, ulttyq sport túrleri festıvali, aýyl sporty) t.b. nasıhattaý syndy taqyryptardy qamtýy tıis. Sondaı-aq elimizde dene shynyqtyrý jáne sport salasynyń problemalaryn kóterý jáne onyń sheshý joldaryn kórsetý, 2016 jylǵy Rıo-De-Janeıro qalasynda ótetin jazǵy Olımpıada jáne Paralımpıada oıyndaryna arnalǵan lıtsenzııalyq jarystardy nasıhattaý (tele jáne radıo túsirilimder men baǵdarlamalar, ınternet, gazet jáne jýrnaldaǵy maqalalar men ocherkter) quptalady.
Baıqaýǵa 2015 jyly shyqqan avtorlyq jumystar (kitaptar, sporttyq entsıklopedııalar, t.b.) da qatysa alady. Ótinishter men maqalalar Astana qalasy, Syǵanaq kóshesi, 25 úı, 11 qabat, Ulttyq shtattyq komandalar jáne sport rezervi dırektsııasynyń baspasóz qyzmetine («2015 jylǵy S. Berdiqulov atyndaǵy baıqaýǵa» degen belgimen) qabyldanady. Qabyldaý merzimi - 2015 jyldyn 5 jeltoqsanyna deıin.
Baıqaýdyń jeńimpazdary «Seıdahmet Berdiqulov atyndaǵy syılyqtyń laýreaty» arnaıy tósbelgisimen marapattalyp, dıplom men aqshalaı syılyqqa ıe bolady.
