Jýrnalıster áleýmettik jeliden alǵan aqparattardy tekserýleri kerek - Dáýren Abaev
«Buqaralyq aqparat quraldary týraly» zań jobasyna 250 ózgeris engiziledi. Úsh sala mańyzdy ózgeristerge ushyraǵan: buqaralyq aqparat quraldary, aqparattandyrý jáne baılanys týraly. Úkimettik emes uıymdar men qoǵam qaıratkerlerinen kelip túsken usynystar eskerildi. Qazirgi tańda BAQ qyzmetin úılestiretin zań jobasy QR Parlamenti Májilisinde talqylanýda.
Aqparat jáne kommýnıkatsııalar mınıstri habarlaǵandaı, zań jobasy iske qosylǵannan keıin jýrnalıster ár adamnyń jeke málimetterin qoldaný úshin odan ruqsat alýǵa mindetteledi.
«Ruqsat alý - bul qalypty nárse. Biz ony qaldyrdyq, naqtyladyq. Jazbasha kelisim alý mindetti emes, aqparatty jarııalaý úshin dıktofonǵa jazyp alsa da jetkilikti. Jeke málimetter búkil álemde qorǵalady. Bul kez kelgen memlekettiń konstıtýtsııasynda túrli deńgeıde bekitilgen. Bul qalypty tájirıbe», - dedi Dáýren Abaev.
Sondaı-aq, mynadaı túsinikter engiziledi: resmı habarlamalar, aqparattyń shynaıylyǵyn tekserý, memlekettik organnyń resmı ókili. Balalardyń zorlyq-zombylyǵy beınelengen sýretterdi jarııalaýǵa tyıym salyndy.
«Biz jýrnalısterdiń aqparatty tekserý úshin birqatar áreketter jasaýy kerektigine senimdimiz. Mysaly, qazir kóptegen aqparattardy tekserýsiz áleýmettik jeliden alyp, jarııalap jatqany jasyryn emes. Biz bul aqparatty jarııalamas buryn, aldymen qońyraý shalyp, naqtylaý qajet dep esepteımiz», - dep habarlady Aqparat jáne kommýnıkatsııalar mınıstri.
