Jýrnalıster akademııasy, kreatıvti hab, BAQ syılyǵy: Ortalyq Azııa forýmynda kóterilgen bastamalar

ASTANA. KAZINFORM — Elordada ótip jatqan ІІ Ortalyq Azııa medıaforýmy barysynda Ortalyq Azııa jýrnalısterine arnalǵan jáne BAQ ókilderin biriktiretin birqatar bastama kóterildi. 

— Búgingi jıyndy paıdalana otyryp, birqatar usynysty ortaǵa salǵymyz keledi. Atap aıtsaq, ózara tájirıbe almasý jáne sala mamandarynyń biliktiligin arttyrý úshin óńirlik forýmdar, semınarlar, trenıngter, sheberlik saǵatyn, baspasóz týrlaryn ótkizýdi usynamyz. Bizdiń tarap osyndaı is-sharalardy uıymdastyrýǵa arnalǵan alańdardy usynýǵa daıyn, — dedi Mádenıet jáne aqparat mınıstri Aıda Balaeva forýmda.

ІІ Ortalyq Azııa medıaforýmda mınıstr kótergen bastamalar:

— elderdiń ǵylymı jáne bilim berý áleýetin biriktire otyryp, Ortalyq Azııa jýrnalıstıka akademııasyn qurý;

— jastardyń daryndy ókilderi úshin shyǵarmashylyq ortalyǵy bolýdy kózdeıtin Ortalyq Azııa kreatıvti habyn qurý;

— úzdik jumystardy atap ótýge jáne laıyqty jýrnalıster men kontentmeıkerlerdiń eńbegin tanýǵa múmkindik beretin jýrnalıstıka salasyndaǵy Ortalyq Azııa syılyǵyn taǵaıyndaý;

— «Bizdiń adamdar» telejobasyn iske qosý, ol arqyly qoǵamnyń eń laıyqty ókilderi, turatyn eline jáne qarym-qatynas tiline qaramastan, jastardy shabyttandyratyn jáne olarǵa ónege bolatyn tulǵalar týraly áńgimeleıdi;

— «Naýryzǵa» arnalǵan telekópir uıymdastyrý, elderge ortaq mereke kúnderi birige túsýge múmkindik beredi;

— baýyrlas elderdiń telearnalary úshin teleónimderdi qoljetimdi etý, serıaldar jáne ózge de ónimder úshin eń tómengi tólemdi belgileý nemese ony múldem alyp tastaý;

— birlesken týrızm men ınvestıtsııany tanymal etýge baǵyttalǵan birlesken kontenttiń kólemin ulǵaıtý;

— Bıyl kúzde «Mıpkom» (MIPCOM) teleónimderiniń eń tanymal kórmesinde «Central Asia» brendimen biryńǵaı alań usyný;

— telearnalar Ortalyq Azııa elderindegi áriptesteriniń ótinimderi boıynsha túsirilimderdi óteýsiz negizde júzege asyratyn alań qurý, bul sheteldik tilshiler pýnktterin ustaýǵa arnalǵan shyǵystardy azaıtýǵa múmkindik beredi.

— Elderimizdiń odan ári ósýi men damýy úshin úlken áleýet bar ekenine, al halyqtarymyz bir-birimiz týraly jaǵymdy aqparatty kóbirek bile túsetinine senimdimin. Jalpy, forým aıasynda Euronews, CNN, ıAndekstiń sheberlik sabaqtaryn ótkizý josparlanyp otyr, bul óte paıdaly bolady dep oılaımyn, sondyqtan áriptesterimdi belsendi qatysýǵa shaqyramyn, — deıdi vedomstvo basshysy.

Aıta keteıik, Astanada ІІ Ortalyq Azııa medıaforýmy ótip jatyr. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.

16 -17 sáýir kúnderi Ortalyq Azııa boıynsha medıa salasynyń mamandary Astanaǵa jınalatyny týraly buǵan deıin habarlaǵan edik.