Jýrnalıst óziniń ár sózine jaýap berýi tıis - Jýrnalıster odaǵynyń tóraǵasy S. Mataev
ALMATY. 23 shilde. QazAqparat - Kez kelgen aqparatqa qoıylatyn eń basty talap - eń aldymen senimdi, sodan keıin ǵana jedeldik pen oqýǵa tartymdy bolýy,
dep sanaıdy QR Jýrnalıster odaǵynyń tóraǵasy Seıitqazy Mataev.
«Qoǵamnyń talqysyna salynatyn kez kelgen aqparat shynaıy, senimdi ári eki derek kózinen tekserilgen bolýy tıis. Sońǵy ýaqytta Qazaqstanda eldi dúrliktirgen birneshe oqıǵalar oryn aldy. Ókinishke qaraı berilip jatqan aqparattardyń basym bóligi shyndyqqa janaspaıdy. Jýrnalıst aqparatty daıyndaýda óziniń ár sózi úshin jaýap beretinin umytpaýy tıis. Bul - jýrnalıstıkanyń basty qaǵıdasy», - dedi S. Mataev.
Onyń sózine qaraǵanda, buqaralyq aqparat quraldary eldi dúrliktirmeýi tıis. «Máselen, sońǵy kúnderi ǵalamtorda «Arqankergen» zastavasynyń birneshe shekarashysy tiri ekendigi, olar V. Chelahtyń oqıǵasyn qaıtalaýdan qorqatyndyǵy jóninde aqparat órip júr. Biraq múrdelerdi taný boıynsha saraptama júrip jatqandyǵy belgili. Árıne, mundaı aqparat qoǵamdy shoshytyp, dúrliktiredi. Taǵy da bir mysal, óńirlik gazettiń saıty bir jyl burynǵy aqparatty jazypty. Bunyń barlyǵy áriptesterimizdiń oqıǵaǵa kásibı turǵydan qaramaýy dep bilemin»,- deıdi QR Jýrnalıster odaǵynyń tóraǵasy.
«Meniń oıymsha, bizdiń mamandyǵymyzdyń eń basty qaǵıdasy senimdi ári shynaıy aqparat bolyp tabylady. Jýrnalıstiń bolyp jatqan oqıǵa beı-jaı qaramaýy tıis ekendigi sózsiz, alaıda ol memlekettik organdar men vedomstvolarǵa, jaýapty tulǵalardyń sózderine júginip, aqparattyń ras-ótirigin tekserýi shart»,- dep atap ótti óz sózinde S. Mataev.
Onyń pikirinshe, búgingi kúni aqparat ómirlik basty ónimbolyp tabylady, óıtken jurtshylyq óz elinde, aýdany men eldi mekeninde bolyp jatqan oqıǵaǵa qanyq bolǵysy keledi. Alaıda, ókinishke qaraı sońǵy ýaqytta kóptegen anonımdi pikirler men blogerler paıda boldy, olar ózderiniń reıtıngterin kóterý úshin uzynqulaqtan taraǵan aqparatty paıdalanady.
«Iá, biz keıde qatelesemiz, tym ásirelep jiberetin kezderimiz de bolady. shyǵarmashylyq uıymdardyń basshysy retinde Qazaqstannyń jýrnalısteri QR Konstıtýtsııasy men zańy aıasynda jumys isteýge tyrysady dep senimmen aıta alamyn. Alaıda sensatsııa qýǵan áriptesterimiz keıde jańsaqtyq jasap, aqparattaǵy óreskel qatelikterge boı aldyratyny bar. Sondyqtan, ásirese adam taǵdyry men qaýipsizdigine kelgende muqııat bolý qajet», - dedi S. Mataev.
Ol jýrnalısterdi, ásirese jas jýrnalısterdi eliniń patrıoty bolýǵa, qyraǵylyq tanytýǵa shaqyrady, óıtkeni keıbir kúshter jýrnalıstıkany óziniń jeke múddesine paıdalanýǵa árekettenedi.
«Dál aqparattar men naqty málimetter, jaqsy saraptamalar barlyq máselelerdi sheshýge, túsinýge kómektesedi. Tekserilgen aqparat bul - jýrnalısterge degen senim, barlyq BAQ-ǵa degen senim», - dep atap ótti QR Jýrnıster odaǵynyń tóraǵasy.
