Jýrnalıst Nurǵoja Narymbaıulynyń esimin oqý orny men kóshege berý usynyldy
ASTANA. QazAqparat - Astana jurtshylyǵy elimizdiń tanymal qalamgeri, aqyn-jýrnalıst Nurǵoja Narymbaıuly Orazdy eske aldy.
2016 jyly 20 aqpan kúni 84 jasqa qaraǵan shaǵynda dúnıe salǵan Nurǵoja Orazdyń máńgilik saparǵa attanǵanyna da jyl bolyp otyr. Osyǵan oraı ótken jıynda marqumnyń rýhyna baǵyshtalyp quran oqyldy. Zamandasy, dosy, belgili jazýshy Ákim Tarazı Nurǵoja Narymbaıulynyń qalamgerlik qarymy, azamattyq tulǵasy týraly oı tolǵady.
Sonymen qatar qalamger Qoıshyǵara Salǵarauly, aqyndar Serik Turǵynbaıuly men Nesipbek Aıtuly, jazýshy Jarasbaı Súleımenov, ǵalym Serik Negımovtar N.Orazdyń qazaq ádebıetindegi orny men Astananyń mádenı-rýhanı damýyna qosqan aıryqsha róli týraly óz oılaryn ortaǵa saldy. Sondaı-aq qoǵam qaıratkeri Orazgúl Asanǵazy memlekettik tildi qorǵaýdaǵy aqyn aǵanyń kúreskerlik joly jastarǵa da úlgi ekenin málimdedi.
Osy basqosýǵa Almatydan arnaıy kelgen, qazaqtyń daryndy aqyny marqum Tumanbaı Moldaǵalıevtiń zaıyby Kúltáı Qasymqyzy da sóz aldy. Ol Tumanbaı men Nurǵojanyń stýdenttik kezden bastap aıyrylmas dos bolǵanyn, bir-birine degen qurmeti, yqylasy erekshe ekenin aıtty. Jınalǵan qaýym Nurǵoja Narymbaıulynyń zaıyby Aıman Qojahmetqyzyna izgi tilekterin jetkizdi.
Aıta ketý kerek, búginde N.Orazdyń nemere-shóbereleri bar, qyzy Saltanat pen uly Nuraıdyń balalary ósip keledi.
Pikir bildirýshiler tarapynan Arqa óńirinde óner men mádenıetti damytýǵa qosqan úlesin eskere otyryp, Nurǵoja Narymbaıulynyń esimin oqý ornyna, kóshege berý týraly usynys aıtyldy. Elordalyqtar bul pikirdiń oryndy ekenin atap ótti.
Eske alý barysynda jurtshylyqqa N.Orazdyń ómiri men shyǵarmashylyǵy týraly shaǵyn derekti fılm kórsetildi.
Nurǵoja Narymbaıuly Oraz 1932 jyly 20 qazanda Qostanaı oblysy Sarykól aýdanyndaǵy Maıak keńsharynda týǵan. 1947 jyly týǵan aýylyndaǵy jetijyldyq mektepti bitirip, Gýrev (Atyraý) pedýchılışesin 1950 jyly támamdaǵan. Munaıly jetijyldyq mektebinde bir jyl muǵalim bolǵan. 1951 jyly Qazaq memlekettik ýnıversıtetiniń fılologııa fakýltetine túsken. 1956-1958 jj. mektepte ustazdyq etken. 1958-1963 jj. Qostanaı oblystyq gazetinde, 1963-1965 jj. «Tyń ólkesi» gazetinde qyzmet etti. 1965 jyly Tselınograd oblysaralyq bólimshesine jaýapty hatshy bolyp taǵaıyndalyp, keıinnen «Jańa Saryarqa» jýrnalynyń ashylýyna muryndyq boldy, basylymnyń bas redaktory bolyp qyzmet atqardy.
Birneshe jyr jınaqtardyń avtory, sondaı-aq «Qarakúıik» atty roman jazǵan.
Nurǵoja Oraz Qazaqstan Respýblıkasynyń eńbek sińirgen mádenıet qyzmetkeri, QR Jýrnalıster odaǵynyń M.Seralın atyndaǵy syılyǵynyń laýreaty, «Astana» jáne «Táýelsizdiktiń 10 jyldyǵy» medaldarymen marapattalǵan. «Qazaqstannyń eńbek sińirgen qaıratkeri» (2006).
