Jýrnalıst N.Baıyrbektiń jańa kitaby jaryq kórdi
ASTANA. 20 aqpan. QazAqparat - Jýrnalıst Názıra Baıyrbektiń «Bılik - bıiktik emes» atty pýblıtsıstıkalyq kitaby jaryqqa shyqty.
Kitapqa alǵysóz jazǵan Memlekettik syılyqtyń ıegeri, aqyn Ulyqbek Esdáýlet jas qalamgerdiń shyǵarmashylyq qyzmetine aq jol tilep, keleshegine úlken senim artady. Ol qalamgerdiń qoǵamdaǵy qalt etken jaıttardy der kezinde kóre bilip, oqyrmanmen oı bólisip otyratyn qasıetin aıtyp ótken.
Jınaq «Oı tolqyndary», «Sara sóz» jáne «Taǵzym» atty úsh bólimnen turady. Kitaptaǵy maqalalar men oı tolǵamdardyń taqyryptarynan da kóp jaıtty ańǵarýǵa bolady. «Jahandaný: álem halyqtary», «Qazaqstan azamaty» degen atqa laıyqpyz ba?», «Táýelsizdik kúni - teńdessiz mereke», «Qazaq tilin qaıyrshydan talap etetin bolyppyz» degen taqyryptardan memleket pen ult múddesi kórinis tapqan. Sonymen qatar avtordyń ulttyq tárbıeni dáripteıtin «At qoıatyn altyn jeńgem qaıda júr?», «Jaqsy ónege qarttarda ma, álde...», «Ákeńniń ósıet etkeni ákimgershilik pe edi?», «Apaı» degenniń nesi aıyp?», «Oıynshyq máselesin oıynshyq kórmeýimiz kerek», «Besiginen bezingen ulttyń bolashaǵy bulyńǵyr», «Jaqynyn jatqa qımas jurt emes pe ek?!» jáne basqa da týyndylary oqyrman tarapynan joǵary baǵasyn alady dep oılaımyz.
«Taǵzym» bóliminde táýelsiz memleketimiz ben qazaq halqy úshin aıryqsha oryn alatyn tarıhı tulǵalar týraly maqalalar toptastyrylǵan.
Aıta ketý kerek, Táýelsizdik jyldarynda bilim alyp, jańa zamanǵa saı jetilip kele jatqan jýrnalıst eńbek jolyn 2001 jyly «Jas Alash» gazetinen bastaǵan. Odan keıin «Qazaq ádebıeti», «Aqjol Qazaqstan», «Aıqyn» gazetteri men «Jalyn» jýrnalynda qyzmet atqardy. Búgingi tańda Názıra - elordalyq «Astana aqshamy» gazetiniń beldi jýrnalısteriniń biri.
Kitapty shyǵarǵan Astana qalasyndaǵy «Profı Medıa» baspasy. Jınaq 255 betten, 15 baspa tabaqtan turady.
