Jýrnalıst Kozachkovtyń baılanysy bar Qospaev qylmystyq toby týraly ne bilemiz
Baspasóz qyzmetiniń málimetinshe, Qospaev pen onyń sybaılastary tanymal kásipkerlerdiń bıznesin tartyp alýy teris qoǵamdyq rezonans týdyratynyn túsinip, Kozachkovtyń qyzmetterin reıderlik basyp alý qurbandaryna aqparattyq shabýyl jasaý maqsatynda paıdalanǵan.
Qarjylyq monıtorıng agenttigi qylmystyq toptyń Almaty qalasynyń kásipkerlerin qorqytý arqyly reıderlik áreketin júzege asyrǵanyn habarlady. UQT zorlyq-zombylyq pen qorqytý arqyly kásipkerlerdiń múlkin tartyp alýmen, kompanııalardaǵy úlesin óz atyna aýdarýmen jáne kóleńkeli bıznespen aınalysty.
Máselen, 2019 jylǵy 4 naýryzda Almaty qalasynda Qospaev óziniń sybaılastarymen birge bıznesti damytýǵa 160 mln teńge salǵan «Profit Trade Ltd» JShS ıelerin óz úlesiniń 40% -yn UQT-nyń belsendi múshesi Imashevqa jazyp berýge májbúr etti. Burynǵy basshylardy basqarmadan shettetip, UQT músheleri qujattardy qoldan jasaý arqyly qalǵan 35% úlesti ıelengen. Kompanııa alkogol ónimderin kóterme satýmen aınalysyp, turaqty tabys tapqan.
Al 2020 jylǵy 30 shildede Qospaevtyń qylmystyq toby óz bıznesine 400 mln teńgeden astam ınvestıtsııa salǵan «Azovita Aktay» JShS men «Azovita Atyray» JShS menshik ıesiniń ómirine qaýip tóndirip, UQT múshelerine kásiporyndardyń jarǵylyq kapıtalynyń 100% úlesin óteýsiz berýge kóndirgen.
Qarjylyq monıtorıng agenttiginiń deregine saı, Qospaev bastaǵan joǵaryda atalǵan UQT músheleri kompanııalardy óz baqylaýyna alyp, olardy Almaty, Atyraý, Qostanaı, Mańǵystaý oblystarynda, sondaı-aq Almaty qalasynda alkogol ónimderin zańsyz satýǵa paıdalana bastaǵan.
Qospaev pen onyń UQT músheleri esh jaza bolmaıtynyn sezinip, tabysty kásiporyndardy tartyp alýdy odan ári jalǵastyrǵan. 2021 jyldyń shildesinde Qapshaǵaı sý qoımasynda «Kapchagai Marina Slub» JShS-ne tıesili quny 2 mln AQSh dollary bolatyn demalys aımaǵyn kúshpen ıemdendi.
Sonymen qatar, Qospaev óziniń senimdi tulǵalary arqyly Almaty qalasynyń eń bedeldi aýdandarynyń birinde «Esentaı Sıtı» turǵyn úı kesheniniń qurylysyn júrgizetin «AV-Construction» JShS-degi úlesiniń 75% ıelendi. Qalǵan 25%-y belgili kásipker Ábdiǵapparovqa tıesili boldy, ol 2016 jyly JShS atynan turǵyn úı qurylysyna 31 ga aýmaqty satyp alǵan.
QMA málimetine súıensek, Qospaev pen onyń seriktesteri baıý maqsatynda týystaryna páterler men kommertsııalyq úı-jaılardy rásimdeý arqyly JShS múlkin urlaǵan. 2018 jyldyń qazan aıynan bastap, Qospaev pen UQT músheleri Babaev, Ábijanov, Tanashev, Kýdrıashova jáne basqa da tulǵalar 3 jer ýchaskesin, 20 keńse úı-jaıyn jáne 113 páterdi ıemdendi. Sóıtip 4,6 mlrd teńge somasyna zalal kelgen.
Qospaev birlesken menshik ıesi Ábdiǵapparovtyń kompanııanyń múlkin urlaýmen baılanysty shaǵymdaryn boldyrmaý úshin onyń anasy S. Júnisbekovaǵa rásimdelgen 25% úlesin alyp qoıýdy uıǵarǵan. Ábdiǵapparovty ustaý jáne keıinnen tutqyndaý UQT músheleri úshin onyń qart anasy S. Júnisbekovaǵa qysym jasaý quraly boldy, «AV-Construction» JShS-degi úlesi úshin ulynyń túrmeden shyǵýyna kómektesýge ýáde bergen. UQT músheleriniń shabýylyna tótep bere almaǵan S. Júnisbekova uly úshin qorqyp, kompanııadaǵy óz úlesin óteýsiz UQT músheleriniń atyna aýdaryp bergen.
Tergeý aıasynda UQT qylmystyq jolmen alynǵan múlkine tyıym salyndy – bul 133 jyljymaıtyn múlik, 11 jer, 35 premıým kólik jáne 9 mıllıon dollar qolma-qol aqsha. Sonymen qatar, Qospaev eshqandaı qujatsyz Almaty oblysynda qala syrtyndaǵy basseıni, trenajer zaly bar sándi úı salǵan. Onda ol asyl tuqymdy jylqylardy ósirip, jabaıy janýarlardan haıýanattar baǵyn ustaǵan, onda arystandar, aıýlar jáne basqa ańdar bolǵan.
«Qosymsha ishki ister organdaryna 2018-2021 jyldary osy úıdiń qyzmetkerin UQT músheleriniń birneshe ret zorlaý faktisi boıynsha materıal jiberilgenin habarlaımyz. Reıderlik basyp alý faktisi jáne UQT jumys isteýine yqpal etken qatysýshy tulǵalardy anyqtaý boıynsha sotqa deıingi tergeý jalǵasyp jatyr» dep jazdy agenttik.
Uıymdasqan qylmystyq top 11 qatysýshydan qurylǵan, qazirgi ýaqytta onyń 5 qamaýǵa alyndy, al uıymdastyrýshy Eldos Qospaevpen birge 6 adamǵa izdeýge jarııalandy.
