Jýrnalıst etıkasy kodeksi qazaqstandyq BAQ-tyń basty ustanymdaryn nyǵaıtýǵa baǵyttalǵan - D.Myńbaı
ASTANA. 30 qazan. QazAqparat - Mádenıet jáne aqparat mınıstri Darhan Myńbaı Qazaqstan jýrnalısterin Qazaqstan Respýblıkasy jýrnalısiniń etıkasy kodeksi qabyldanýymen quttyqtady.
QazAqparat quttyqtaýdyń mátinin taratady.
Mádenıet jáne aqparat mınıstri D.Myńbaı bylaı dep málimdedi:
Men Qazaqstan jýrnalısterin tarıhı oqıǵa - Qazaqstan Respýblıkasy jýrnalısiniń etıkasy kodeksi qabyldanýymen quttyqtaǵym keledi.
Ózderińiz biletindeı, Kodeksti jasaý ıdeıasyn Qazaqstan Respýblıkasynyń Prezıdenti Nursultan Nazarbaev óziniń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı jıyrma qadam» dep atalatyn maqalasynda aıtqan bolatyn. Kodeksti ázirleý jáne qabyldaýǵa deıingi odan ári jumysty Bas redaktorlar klýbynyń qoldaýymen Qazaqstan Jýralıster odaǵy óz moınyna aldy. Qujattyń mátini búkil el boıynsha jýrnalıster arasynda keńinen talqylandy. Bul oraıda halyqaralyq tájirıbe, EQYU sııaqty jáne basqa da uıymdardyń materıaldary muqııat zerdelengenin bilemin.
Bul Kodekske qol qoıylýy salany damytýdyń sapaly jańa kezeńi bastalýy dep baǵalaýǵa múmkindik beredi jáne qazaqstandyq jýrnalıstıkanyń joǵary korporatıvtik rýhynyń kýási bolyp tabylady.
Kodekstiń qazaqstandyq jýrnalıstıkanyń basty kásibı-etıkalyq ustanymdaryn nyǵaıtýǵa baǵyttalǵany qýanyshty. Qujattyń kirispesinde kórsetilgendeı, «Kodeks ózin ustaı bilýge moraldyq-etıkalyq baǵdar bolyp tabylady, jýrnalıster men buqaralyq aqparat quraldaryna senim men qurmetke qol jetkizýge járdemdesedi».
Kodeks otandyq jýrnalıstıkada jaqsy jáne mańyzdy dástúrlerdi qalyptastyrýǵa yqpal etedi, BAQ-tyń ózin-ózi retteýiniń tıimdi tetigi qyzmetin atqarady dep senemin.
