Jýrnalıst, depýtat, kásipker – «Aq jol» partııasy Prezıdent saılaýyna úmitkerlerdi qarastyryp jatyr
«Keshe partııamyzdyń ulttyq keńesiniń otyrysy ótti. Ulttyq keńesimizdiń músheleri kezekten tys Prezıdent saılaýyna «Aq jol» demokratııalyq partııasynyń qatysýy týraly usynys jasady», - dedi «Aq jol» demokratııalyq partııasynyń tóraǵasy Azat Perýashev.
Sezdegi ekinshi másele – partııa atynan osy saılaýǵa túsetin úmitkerdi tańdaý.
«Bul boıynsha ortaq kelisimge kelgen joqpyz. Sheshimdi qabyldaýǵa tek sezdiń ózi quzireti bar. Bul máseleni sizderdiń qaraýlaryńyzǵa shyǵaraıyq dep sheshtik. Bir partııa bolǵandyqtan, aramyzda túrli pikir bolsa da, partııamyz atynan, quryltaı qabyldaǵan sheshimdi qabyldap, bárimiz bul úmitkerge qyzmet etýge tıispiz dep bilemin. Sony saqtaýǵa sizderdi shaqyramyn», - dedi Azat Perýashev.
Onyń aıtýynsha, Prezıdent Qasym-Jomart Toqaev kezekten tys saılaý jarııalaǵaly partııa atynan 6 adam saılaýǵa túsýge nıet bildirgen.
«Bul 6 adamnyń biri – iri bıznesmen, bizdiń partııa atynan qatysqysy keldi, biraq pleným ony qoldamady. Taǵy bir kisi basynda qatysamyn dep, keıinnen qatyspaýdy uıǵardy. Taǵy bir adam ózi ulttyq keńeste usynys jasaldy, biraq sońynda bas tartty. Aıaǵynda úsh úzeńgilesimiz partııa atynan saılaýǵa qatysýǵa nıetti», - dedi Azat Perýashev.
Úsh úmitkerdiń biri – jetisýlyq jýrnalıst Sandýǵash Dúısenova, Májilis depýtaty Serik Erýbaev jáne «Aq jol» QDP Aqtóbe oblystyq fılıalynyń tóraǵasy, kásipker Asqar Sadyqov.
Ázirge el óńirlerinen jınalǵan júzden astam sezd delegattary úsh úmitkerdiń sózin tyńdap, óz suraqtaryn qoıyp jatyr.
«Odan bólek, ulttyq keńeste keı áriptesterimiz Prezıdenttiń Pavlodarda aıtqan sózin, onyń qoǵamdyq qozǵalystar atynan túsetinin estip, Prezıdentti qoldaýdy da usyndy. Mundaı pikirmen de sanasýymyz kerek», - dedi Azat Perýashev.
Eske sala ketsek, 2019 jyly 9 maýsymda eldegi Prezıdent saılaýyna «Aq jol» demokratııalyq partııasy atynan Dánııa Espaeva qatysqan edi. Qazaqstan saılaý tarıhyndaǵy alǵashqy áıel-kandıdat saılaýshylar daýsynyń 5,05 % jınady.
