Jýrnaldyń maqsaty - balalar shyǵarmashylyǵyn damytý
ASTANA. 1 qazan. QazAqparat - Astana qalasynda 2009 jyldan bastap respýblıkalyq «Balalar shyǵarmashylyǵy» jýrnaly jaryq kórip keledi.
Bul memlekettik tilde shyǵatyn jáne elimizdiń barlyq óńirine taraıtyn balalar basylymy. Aıtalyq, ózge jýrnaldar tanymal aqyn-jazýshylardyń balalarǵa arnalǵan shyǵarmalaryn jarııalasa, «Balalar shyǵarmashylyǵy» jýrnaly balalardyń ózderi jazǵan tyrnaqaldy týyndylaryn beredi. Jýrnal oqýshylardyń shyǵarmashylyǵyn nasıhattaıdy, turmysy tómen otbasyndaǵy talantty balalardyń jan-jaqty kórinýine de qoldaý kórsetedi.
Qazaq balalary ádebıetin qoldaý jáne damytý «Paryz» qoǵamdyq qorynyń dırektory, respýblıkalyq «Balalar shyǵarmashylyǵy» jýrnalynyń bas redaktory Ádilbek Jaqypuly: «Balalardyń jazǵan óleń, áńgimeleri talapqa saı bolmaı jatsa, elep-ekshep, shaǵyndap, til zańdylyǵyna kelmeı turǵan tustaryn túzetemiz. Biraq stılin, aıtaıyn degen oıyn saqtaımyz. Jyl saıyn oqyrman ósip keledi. Respýblıka boıynsha eki myń danasyn balalar pochta arqyly jazdyrtyp alady. Munyń syrtynda 1,5 myń danasyn qala mektepterine taratamyz. Sondaı-aq 500 dana jýrnaldy jetim balalar úıine, mektep-ınternattarǵa tegin beremiz. Ondaǵy tárbıelenýshiler de hat jazyp turady. Ásirese, alys shalǵaı óńirde turatyn oqýshylar jýrnaldy qyzyǵa oqıdy jáne ózderi jazǵan týyndylaryn bizge jiberedi. Múmkindiginshe aýyl balalarynyń óleń-áńgimelerin jáne de avtordyń sýretin qosa jarııalaımyz. Balalardyń azamat bolyp qalyptasýyna jýrnaldyń yqpaly kóp dep oılaımyn»,-deıdi.
Jýrnaldyń Bas redaktory aldaǵy josparlarymen bólisti. Ol baılanys jasap turǵan balalarǵa arnaıy taqyryptar berip, sol boıynsha shyǵarma jazýǵa baýlyǵandy jón kórip otyrǵanyn aıtty. Basylym betinde patrıottyq taqyrypta «Qazaq álemi» degen aıdar ashylǵan. Onda halqymyzdyń tarıhynan, ádet-ǵurpynan birsypyra tanymdyq materıaldar jarııalanady. Sondaı-aq balalardyń sýret salý ónerine de kóńil aýdarylady. Sport pen óner jolynda júrgen daryndy balalar da dáriptelmek.
«Qazir kelesi jylǵa baspasózge jazylý naýqany bastalyp ketti. Osy oraıda buryn baılanys ornatqan mekteptermen habarlasyp jatyrmyz. Jańadan jazylatyndardyń qataryn molaıtpaqpyz. Jýrnalymyzdy tanystyrý maqsatynda úlken kompanııalardyń nazaryna usynamyz. Olardan aqsha suramaımyz. Otanyn oılaıtyn, patrıottyq sezimi bar azamattar bolsa, bizge habarlasady. Ózderiniń balalary úshin jýrnaldy jazdyrtyp alady»,- dedi Á.Jaqypuly.
