Júrmeı qalǵan poıyz jolaýshylaryna bılet quny tolyq qaıtarylady

NUR-SULTAN. QazAqparat – Keste boıynsha júrmeı qalǵan poıyzdardyń jolaýshylaryna bılet quny tolyq qaıtarylady. Bul týraly «Qazaqstan temir joly» ulttyq kompanııasynyń basqarma tóraǵasynyń birinshi orynbasary Qanat Álmaǵambetov málim etti, dep habarlaıdy QazAqparat tilshisi.

«Keste boıynsha júrmeı qalǵan poıyzdardyń jolaýshylaryna bılettiń tolyq quny qaıtarylyp jatyr. Búgin tańerteń 24 mln 488 myń teńge somasyndaǵy 5321 bılet qaıtaryldy. Sonymen qatar ınternettiń bolmaýynan bul baǵytta jumystarda birshama qıyndyq týyndap otyr. Bıletti qaıtarý tek «Jolaýshylar tasymaly» AQ-nyń kassalarynda júrip jatyr», - dedi Qanat Álmaǵambetov Ortalyq kommýnıkatsııalar qyzmetinde.

Onyń aıtýynsha, jolaýshylar 6 aı merzimde osy bıletter boıynsha «Jolaýshylar tasymaly» kassalarynda, elektrondy júıelerde aqshany qaıtaryp ala alady.

«Sondyqtan ınternettiń qosylmaýyn eskere otyryp, bul bıletterdi qaıtarýǵa asyqpaýǵa keńes beremiz. Aıta keteıik, qazirgi ýaqytta bıletterdi satyp alýdy tek qolma-qol aqsha arqyly júrgizip jatyrmyz», - dedi Qanat Álmaǵambetov.

Budan buryn habarlanǵandaı, Qanat Álmaǵambetov elimizdiń aýmaǵyndaǵy poıyzdar qozǵalysyna túsinikteme berdi. QTJ jedel shtaby Kólik komıtetiniń kelisimimen 25 jolaýshy poıyzynyń qozǵalysy toqtatylyp, 13 poıyz qosyndarǵa qaıtaryldy.