Júrgizýshisiz jańa energetıkalyq kólikter kende jumys isteýde - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ortalyq Azııa elderiniń jýrnalısteri Tashkentte bas qosty - «ÓzA»
Tashkent qalasynda Shanhaı yntymaqtastyq uıymynyń (ShYU) Qoǵamdyq dıplomatııa ortalyǵy, Ózbekstan Jýrnalıster odaǵy, Ózbekstan Ulttyq BAQ qaýymdastyǵymen birlesip «Ortalyq Azııa daýysy»: ulttyq keńistikten aımaqtyq keńistikke» taqyrybynda Ortalyq Azııa elderi jýrnalısteriniń kezdesýi ótti, dep habarlaıdy «ÓzA» aqparat agenttigi.
Qazaqstan, Qyrǵyzstan jáne Tájikstan elderiniń BAQ ókilderi qatysqan sharada qonaqtar Ózbekstan Ulttyq teleradıokompanııasynyń tarıh murajaıynyń jádigerlerin tamashalady.
Ózbekstandyq medıa ortalyqta telearnalar, sonyń ishinde «Ózbekstan tarıhy» telearnasy úshin túrli baǵdarlamalar men shoýlar túsirýge arnalǵan stýdııalardaǵy jýrnalıster men tehnıkalyq qyzmetkerlerge jasalǵan jaǵdaımen tanysty.
Sondaı-aq, «ÓzA»-da «Ózbekstan men Qazaqstan shekaradan azamattardy ID karta arqyly ótkizýdi talqylap jatyr» degen taqyryptaǵy aqparat jarııalandy.
Ózbekstan men Qazaqstannyń resmı vedomstvolary eki el azamattarynyń memlekettik shekaradan ulttyq jeke kýálik (ID karta) arqyly ótýine ruqsat berý máselesin talqylap jatyr.
«Bul týraly Ózbekstan Prezıdentiniń syrtqy saıasat jónindegi arnaıy ókili Abdýlazız Komılovtyń «Jańa Ózbekstan» gazetasynda jarııalaǵan maqalasynda aıtylǵan», dep jazady ózbestandyq BAQ.
Saıasatker Astana qalasynda ótken Ortalyq Azııa elderi basshylarynyń altynshy Konsýltatıvtik kezdesýi aımaqtaǵy barlyq elderdiń keıingi alty jyldaǵy kezekti tóraǵalyǵynyń nátıjesin sımvoldy qorytyndysy bolǵanyn aıtyp, bul format memleketaralyq yntymaqtastyqtyń jańa kezeńin bastap bergenin málimdegen.
Abdýlazız Komılov óz maqalasynda, búginde Ózbekstan men Ortalyq Azııa elderi arasyndaǵy shekarany dostyq pen tatý kórshilik kópiri dep ataýǵa bolady. 2023 jyldyń 1 qyrkúıeginen bastap Ózbekstan-Qyrǵyzstan shekarasynan ótýde azamattar ID kartany paıdalanýda. Dál osyndaı joba Qazaqstanmen de talqylanýda ekenin jazǵan.
Irannyń toqyma ónerkásibi kórmesine 120 sheteldik kompanııa qatysady - «Parstoday»
Irannyń toqyma ónerkásibiniń 30-shy kórmesi Tehran halyqaralyq kórmeleriniń turaqty ornynda 13 elden 170 ırandyq kompanııa men 120 sheteldik kompanııanyń qatysýymen bastaldy, dep habarlaıdy Irannyń «Parstoday» aqparat agenttigi.
Irandyq BAQ-tyń málimetinshe, 29 mýrdad (19 tamyz) Tehran halyqaralyq kórmeleriniń turaqty ornynda bastalǵan Irannyń toqyma ónerkásibiniń, sonyń ishinde mashına jasaý, shıkizat, úı toqyma buıymdary, keste tigý mashınalary men toqyma buıymdarynyń 30-shy kórmesi shahrıvardyń 1-ine (22 tamyz) deıin jalǵasady.
Bul kórmege Germanııa, Italııa, Taıvan, Ózbekstan, Tájikstan, Ońtústik Koreıa, Túrkııa, Pákistan, Avstrııa, Shveıtsarııa, Úndistan, Japonııa jáne Qytaıdan kelgen qatysýshylar toqyma ónerkásibi salasyndaǵy sońǵy ónimderi men qyzmetterin usynady.
Atalǵan halyqaralyq basqosýǵa 290-nan astam ırandyq jáne sheteldik kompanııalar óz múmkindikterin tanystyrý, ınvestıtsııa, saýda jáne saýda almasýlaryn qamtamasyz etý jáne osy salanyń jańa málimetterin bir-birimen talqylap, almasý úshin jınaldy.
Sondaı-aq osy aptada «Parstoday» aqparat agenttiginde «Irannyń Pars halyqaralyq foto festıvaline 63 elden fotograftar qatysady» degen taqyryptaǵy aqparat jaryq kórgen bolatyn.
Pars halyqaralyq fotofestıvaliniń birinshi kezeńi mádenıet pen ónerdi qoldaý salasyndaǵy áleýmettik jaýapkershilik róline sáıkes fotosýret ónerin damytý, daryndy jastar men sýretshilerdi qoldaý Irannyń Pars aımaǵynyń múmkindikterin tanystyrý maqsatymen qyrkúıek aıynda ótpek.
Pars halyqaralyq fotofestıvaliniń jaýapty hatshysy Reza Mırmehrabıdiń aıtýynsha, bul shara úsh sektorda ótedi: munaı ónerkásibi, otbasy, ekologııa jáne týrızm jáne 63 eldiń fotograftaryn qarsy alady. Festıvalge túsken jumystardy baǵalaýdan keıin ártúrli sektsııalardyń jeńimpazdary anyqtalady. Kórmeniń ashylýymen bir ýaqytta shahrıvardaǵy saltanatty sharada tańdalǵan jumystar tanystyrylyp, baǵalanady.
Kende júrgizýshisiz kólikter jumys istep júr - «Halyq gazeti»
Jaqynda Holın-Gol qalasynda Ulttyq elektr energetıkasy ınvestıtsııalyq toby Іshki Mońǵol kompanııasynyń (SPIC）Ońtústik ashyq kómir keni 35 jańa 100 tonnalyq energetıkalyq júrgizýshisiz taý-ken júk kóligin engizdi, dep habarlaıdy qytaılyq «Halyq gazeti» basylymy.
Qytaılyq basylymnyń málimetinshe, olardyń otyn únemdeýi 20%-dan 30%-ǵa deıin jetedi.
«Al árbir júrgizýshisiz kólik jyl saıynǵy kómirqyshqyl gazynyń shyǵaryndylaryn 100 tonna azaıtady. Sonymen qatar júrgizýshisiz tasymaldaý júıesi jergilikti jumys júrgizetin qyzmetkerlerge suranysty azaıtyp, búkil shahtanyń óndiristik qaýipsizdigin jaqsartady», dep jazdy qytaılyq BAQ.
Sondaı-aq, osy aptada «Halyq gazeti» basylymynda «Qazaq dárigeri Qytaıdaǵy «eń úzdik dáriger» ataǵyn aldy» degen aqparat jarııalandy.
19 tamyzdaǵy Qytaı Dárigerleri kúnine oraı Ortalyq úgit-nasıhat basqarmasy men ulttyq densaýlyq saqtaý komıteti 2024 jylǵy «Eń úzdik dárigerlerdiń» tizimin jarııalady. Qazaq dárigeri Máýlishárip Qapa úzdik dep tańdaldy, dep habarlaıdy Qytaıdyń «Halyq Gazeti».
Qytaılyq BAQ-tyń dereginshe, Máýlishárip Qapa Shyńjańnyń Býryltoǵaı aýdanyndaǵy aýyldyń zeınetker dárigeri.
Ol 40 jyl boıy sharýashylyq óńiriniń túkpir-túkpirin aralap, dári-dármek pen dárigerlik qyzmetin em alýshylardyń otbasyna deıin jetkizgen.
M. Qapa jumys babymen júrgende Shyńjańnyń Býryltoǵaı aýdanyndaǵy eldi mekenderdi aralap, árbir malshy otbasymen tanysqan.
Máýlishárip Qapa 1975 jyly Shyńjań Halyqtyq qytaı medıtsına mektebin bitirgennen keıin Býryltoǵaı aýdanyndaǵy jumysyn atqarǵan 47 jylda ol óziniń tamasha dárigerlik sheberligimen jáne kásibı etıkasymen halyqtyń qurmetine bólengen.
Ol tek óz kásibimen ǵana aınalysyp qoımaı, qoǵamdyq jumystarǵa da belsene aralasqan.
Atap aıtqanda, 1992 jyldan 2022 jylǵa deıingi 30 jyl ishinde Býryltoǵaı aýdanynyń bilim berý salasyna 700 000 ıýannan joǵary qarjy aýdaryp, 500-den astam mektepti tastap ketken balanyń oqýǵa qaıta oralýyna kómektesken. Sondaı-aq 36 kedeı oqýshynyń oqýyn tolyq aıaqtaýyna qarjylyq jaqtan qol úshin sozǵan.
Aıta keteıik, Máýlishárip Qapa kóp jyl buryn zeınetke shyqqanymen áli de aýyldastarynyń syrqatyn emdep keledi.
Túrkııa munaı men tabıǵı gaz óndirisinde rekord jańalady - TRT
Energetıka jáne tabıǵı resýrstar mınıstrligi jasaǵan jazbasha málimdemede mınıstr Alparslan Baıraktar 2024 jyldy munaı jáne tabıǵı gaz óndirisin arttyrý jyly dep jarııalady. Oǵan sebep Túrkııada osy aıda munaı men tabıǵı gazdyń kúndelikti óndiris rekordtary jańarǵan.
Bul týraly osy aptada Túrkııa Radıo Televızııa portaly habarlady.
A. Baıraktardyń aıtýynsha, kózdegen maqsatqa qaraı ilgerileýshilik bar. Tamyz aıynda munaı men tabıǵı gaz óndirý tarıhtaǵy eń joǵary deńgeıge jetken. 17 tamyzda shıki munaı óndirý 107 myń 621 barrel boldy. Bul óndiristiń 95 myń 656 barreli Túrik munaı aktsıonerlik qoǵamy júzege asyrdy. Dál sol kúni Túrkııa Gabar taýyndaǵy uńǵymalardan 47 myń 58 barrel óndirý kórsetkishine jetti.
Sondaı-aq, Ulttyq energetıka jáne taý-ken saıasaty aıasynda Túrkııanyń óz kemeleri, ınjenerleri jáne qondyrǵylarymen energııadaǵy syrtqy táýeldilikti joıýǵa úlken tabandylyqpen qadam basyp kele jatyr.
