Júrgizýshilerdiń benzınmen júretin kólikterin gazǵa aýystyrýynyń sebebi nede

ALMATY. KAZINFORM – Avtokólikterdiń benzınnen suıytylǵan gazǵa kóshýiniń basty sebepteriniń biri – baǵa aıyrmashylyǵy. Bul týraly Energetıka mınıstri Almasadam Sátqalıev málim etti.

Aıtýynsha, elde suıytylǵan munaı gazynyń 1 lıtrine 59-89 teńge deńgeıinde belgilengen tómen baǵaǵa baılanysty otynnyń bul túrin tutyný ósti.

– Osylaısha, 2023 jyly suıytylǵan munaı gazynyń ishki tutynýy 2 287 myń tonna bolsa, 2024 jyly suranys shamamen 2 382 myń tonnaǵa jetip, 4 paıyzǵa artty. Avtokólikterdiń benzınnen suıytylǵan gazǵa kóshýiniń basty sebepteriniń biri – baǵa aıyrmashylyǵy.Іshki ister mınıstrliginiń málimeti boıynsha, 2024 jyldyń 11 aıynda gaz qozǵaltqyshy bar avtokólikter sany 661 myń birlikti qurady nemese 2023 jylmen salystyrǵanda 12 paıyzǵa ósti, – dedi Almasadam Sátqalıev.

Sonymen qatar, ol 2024 jyldyń shilde aıynda ıınıstrliktiń buıryǵymen suıytylǵan gazdy kóterme jáne bólshek saýdada ótkizýdiń shekti baǵalary bekitilgenin jetkizdi.

– Máselen, óńdeýshi kásiporyndar úshin eń joǵary kóterme baǵa tonnasyna 45 158 teńge, al Almaty qalasynda suıytylǵan munaı gazynyń shekti bólshek saýda baǵasy 1 lıtr úshin 89 teńge.Óńirde 4 gaz jelisi uıymy jáne 147 avtogaz quıý stantsııasy bar. 2023 jyly qalada 118 myń tonna suıytylǵan munaı gazy tutynyldy. Osy jyldyń qańtar-qarasha aılarynda shamamen 131 myń tonna tutynyldy,– dep atap ótti mınıstr.

Almaty qalasyn gazdandyrý deńgeıi 100 paıyzǵa jetti. Qazir 2 mıllıonǵa jýyq adam gazben qamtylǵan.

Buǵan deıin, Almasadam Sátqalıev janar-jaǵarmaı baǵasy qatań baqylaýda ekenin aıtqan bolatyn.