Júrgizýshiler birin-biri basyp ozýǵa tyrysqan — Aqmoladaǵy 95 avtokólik apatynyń sebebi aıtyldy

ASTANA. KAZINFORM — QR TJM Tótenshe jaǵdaılardy joıý departamenti bastyǵynyń orynbasary Aslan Ýákishev Aqmola oblysyndaǵy 95 avtokóliktiń soqtyǵysý sebebin aıtty. Onyń aıtýynsha, qazir tıisti tergeý jumystary júrgizilip jatyr. 

− Borandy kúnderi Іshki ister mınıstrliginiń qyzmetkerleri kolonnany alyp júrdi, alaıda sol jerde bir-birin basyp ozýǵa tyrysqan jaýapsyz júrgizýshiler bolǵan. Barlyǵy osydan týyndaǵan bolýy múmkin. Qazirgi ýaqytta tergeý jumystary áli jalǵasýda, — dedi A. Ýákishev Ortalyq kommýnıkatsııalar qyzmetinde ótken baspasóz máslıhatynda. 

Spıker Tótenshe jaǵdaılar mınıstrliginiń quzyretine jábirlenýshilerdi qutqarý jáne evakýatsııalaý kiretinin eske saldy. 

− Bizdiń bólimsheler úılesimdi jumys atqaryp, múmkindiginshe barlyq adamdy qutqaryp, evakýatsııalap, jylyný pýnktterine jetkizdi. Jolaýshylarǵa jylyný pýnktterinen Astanaǵa jáne basqa da baǵyttarǵa jetý qajet boldy, biz olardy poıyzdarǵa mingizdik, — dedi A. Ýákishev. 

Buǵan deıin 3 qańtarda «Astana-Şýche» tas jolyndaǵy jappaı kólik apatynda 95-ke jýyq avtokólik zardap shekkenin jazǵan bolatynbyz.