Júrgizýshi mas bolǵan: Almaty oblysynda mektep avtobýsy apatqa ushyrady

QONAEV. KAZINFORM- Almaty oblysynda balalar mingen mektep avtobýsy jol-kólik apatyna tústi. Keıin júrgizýshiniń ishimdik ishkeni anyqtaldy.

Almaty oblysynyń Qarasaı ákimshilik quqyq buzýshylyqtar jónindegi mamandandyrylǵan aýdanaralyq sotynyń málimetinshe, 5 aqpan kúni saǵat 20:10 shamasynda júrgizýshi G. salonynda balalary bar mektep avtobýsyn mas kúıinde basqarǵan. Keıin rýlge ıe bola almaı Kemertoǵan aýylynda elektr beton baǵanasyna soǵylǵan.

Jol apatynan zardap shekkender joq, kólikke mehanıkalyq zaqym kelgen. Sondaı-aq elektr beton baǵanasynyń ıesine materıaldyq zalal keltirilgen.

«6 aqpan kúni Qazaqstan Respýblıkasy Ákimshilik quqyq buzýshylyq týraly kodeksiniń 608-babynyń 3-bóligi (kólik quralyn alkogoldik masań kúıde basqarýy) boıynsha quqyq buzýshy G-ge qatysty ákimshilik quqyq buzýshylyq týraly is qaraldy», - dep habarlady Qarasaı ákimshilik quqyq buzýshylyqtar jónindegi mamandandyrylǵan aýdanaralyq soty.

Onyń kinási ákimshilik quqyq buzýshylyq týraly is materıaldarymen, sottalýshynyń aıǵaǵymen jáne basqa da obektıvti dáleldemelermen tolyq dáleldenip, rastaldy.

«Quqyq buzýshy G. ÁQBtK-niń 608-babynyń 3-bóligimen kózdelgen ákimshilik quqyq buzýshylyqty jasaǵany úshin kináli dep tanylyp, oǵan 20 táýlikke ákimshilik qamaqqa alý jáne 7 jyl merzimge kólik quralyn basqarý quqyǵynan aıyrý jazasy taǵaıyndaldy», - dep atap ótti sottan.

Sot qaýlysy zańdy kúshine engen joq.