Júrgizýshi kýáliginen aıyrylǵandar sany eki esege artty: Іshki ister mınıstri Prezıdentke esep berdi

ASTANA. KAZINFORM – Prezıdent Qasym-Jomart Toqaev Іshki ister mınıstri Erjan Sádenovti qabyldady, dep habarlaıdy Aqordanyń baspasóz qyzmeti.  

Qasym-Jomart Toqaevqa elimizdegi krımınogendik ahýal jaıynda málimet berildi.

Mınıstrdiń aıtýynsha, jyl basynan beri qylmys deńgeıiniń tómendeýi baıqalyp otyr. Atap aıtqanda, qylmystyq quqyq buzýshylyqtar sany tórt myńǵa, sonyń ishinde qylmys jeti myńǵa azaıǵan. Qoǵamdyq oryndarda jasalatyn jáne kámeletke tolmaǵan azamattardyń qatysy bar quqyq buzýshylyqtar tómendegen. Sonymen qatar qylmystyń barlyq túrin ashý kórsetkishi jaqsarǵan.

Memleket basshysyna uıymdasqan, kıber jáne esirtki qylmystaryna qarsy is-qımyl, jol qaýipsizdigin qamtamasyz etý, sondaı-aq kadrlyq áleýetti arttyrý jóninde buǵan deıin bergen tapsyrmalarynyń oryndalý barysy baıandaldy.

Mınıstr «Zań jáne Tártip», quqyq buzýshylyqqa múldem tózbeýshilik qaǵıdattaryn iske asyrý, sondaı-aq qylmystyń aldyn alý sharalary týraly aıtty. Jyl basynan beri ákimshilik quqyq buzýshylyqtyń jolyn kesý kórsetkishi 45 paıyzǵa ulǵaıǵan, sonyń ishinde usaq buzaqylyq úshin jaýapqa tartylǵandar 30 paıyzǵa, jol júrý erejesin buzý faktilerin anyqtaý 47 paıyzǵa artqan. Nátıjesinde júrgizýshi kýáliginen aıyrylǵandar sany eki ese kóbeıgen.

Budan bólek, Prezıdentke qylmystyq-atqarý júıesi mekemelerindegi jaǵdaı týraly aqparat berildi.

Kezdesý sońynda Memleket basshysy eldegi quqyqtyq tártip pen qoǵamdyq qaýipsizdik deńgeıin odan ári arttyrý boıynsha birqatar mindet júktedi.