Júrgizýshi kýáligine teorııalyq emtıhandardy qashyqtyqtan tapsyrý múmkindigi engizilmek
ASTANA. KAZINFORM — Júrgizýshi kýáligin alý úshin teorııalyq emtıhandardy qashyqtyqtan tapsyrý múmkindigin engizý máselesi pysyqtalyp jatyr. Bul týraly Quryltaı depýtattarynyń saýalyna Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń jaýabynda aıtylǵan.
Onyń málimetinshe. teorııalyq emtıhandardy qabyldaý úshin Memlekettik qyzmet isteri agenttiginiń aýmaqtyq bólimsheleri bazasyn qoldanýǵa múmkindik joq. Óıtkeni, ol alańdar ózge emtıhandar qabyldaýǵa arnalmaǵan. Al Ulttyq testileý ortalyǵynyń alańynda teorııalyq emtıhan qabyldaýǵa múmkindik bar.
Qazirgi ýaqytta Astanada atalǵan ortalyqtyń alańdaryn pılottyq rejımde paıdalanýǵa ýaǵalastyq jasalǵan. Tehnıkalyq daıyndyq aıaqtalyp, tıisti birlesken buıryqqa qol qoıylǵan. Joba osy aıda iske asyrylyp, odan keıin aımaqtarǵa keńeıtiledi.
— Sonymen birge, jasandy ıntellekt jáne proktorıng tehnologııalaryn qoldana otyryp teorııalyq emtıhandardy qashyqtan tapsyrýdy engizý pysyqtalyp jatyr. Bul mamandandyrylǵan HQO-ǵa júktemeni azaıtýǵa múmkindik beredi, — dedi Jaslan Mádıev.
Aıta keteıik, bıyl Almaty jáne Qaraǵandy qalalarynda jańa avtodromdar ashylady.
