Júrgizýshi kýáligine emtıhanǵa eGov arqyly jazylýǵa bolady
ASTANA. KAZINFORM — Júrgizýshi kýáligin alý úshin emtıhandarǵa jazylýdy eGov jáne eGov Mobile qosymshalaryna shyǵarý máselesi pysyqtalyp jatyr. Bul týraly Quryltaı depýtattarynyń saýalyna Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń jaýabynda aıtylǵan.
— Qazirgi ýaqytta júrgizýshi kýáligin alý úshin emtıhandarǵa jazylý «TsON» mobıldi qosymshasy arqyly onlaın-rejımde júzege asyrylady. Atalǵan mehanızmniń qoljetimdiligin arttyrý maqsatynda osy servısti eGov jáne eGov Mobile-ǵa qosymsha shyǵarý máselesi pysyqtalyp jatyr, — dedi vıtse-premer.
Onyń atap ótýinshe, jasandy ıntellekt jáne proktorıng tehnologııalaryn qoldana otyryp, teorııalyq emtıhandardy qashyqtyqtan tapsyrýdy engizý maqsatynda júrgizilip jatqan jumys aıasynda teorııalyq emtıhandy tapsyrýdyń kúndizgi formatyn tańdaǵanda ǵana aldyn ala jazylý qajet bolady. Qashyqtyq formatynda emtıhan tapsyrǵanda oryn sanyna shekteý bolmaıdy jáne yńǵaıly ýaqytta tapsyrýǵa múmkindik bar.
— Bul sharalar azamattardyń emtıhandarǵa jazylýǵa teń qoljetimdiligin, bos oryndardy bólýdiń ashyqtyǵyn qamtamasyz etýge jáne deldaldyq qyzmet táýekelderin barynsha azaıtýǵa baǵyttalǵan, — dedi Jaslan Mádıev.
Sonymen qatar ol depýtattardyń Mamandandyrylǵan HQO-lardyń jumys ýaqytyn uzartý usynysyna jaýap bergen edi.
