Júrgizýshi kýáligin úıde otyryp-aq retteýge múmkindik bar
ASTANA. KAZINFORM – Búginde Іshki ister organdary halyqqa 105 qyzmet túrin kórsetedi. Jyl basynan beri turǵyndarǵa 5 mln-ǵa jýyq memlekettik qyzmet usynylǵan. Onyń ishinde tólqujat nemese júrgizýshi kýáligin alý, avtokólikti tirkeý sııaqty qyzmetter suranysqa ıe.
ІІM departament bastyǵy – ІІM resmı ókili Shyńǵys Alekesheevtiń aıtýynsha, memlekettik qyzmet alýǵa kúnine orta eseppen 40 myńdaı azamat júginedi eken.
«Jyl saıyn kólik quraldaryn tirkeý máselesi boıynsha 2,5 mıllıonnan astam azamat, al júrgizýshi kýáligin alýǵa 1 mıllıonnan astam adam júginedi. Qujattardy rásimdeý nemese olardy aýystyrý úshin shamamen 2,5 mln azamat júginse, 2 mln-ǵa jýyq adam turǵylyqty jeri boıynsha tirkeý máselesimen keledi. ІІM memlekettik qyzmetterdi avtomattandyrýǵa jáne ońtaılandyrýǵa erekshe nazar aýdarady. Bul qyzmet kórsetýdi jedeldetip, polıtsııamen tikeleı baılanysty azaıtady, azamattardyń ómirin jeńildetedi», - deıdi ol.
Belgili bolǵandaı, eger buryn tólqujattar men jeke kýálikter eki aı ishinde berilse, qazir bul merzim 15 jumys kúnine deıin qysqartylǵan. Al qujattardy daıyndaý ortalyqtary bar Astana, Almaty, Shymkent jáne Aqtóbe qalalarynda ótinish berýshi qujattardy tipti bir jumys kúni ishinde ala alady.
Taǵy bir atap óterligi, ІІM memlekettik qyzmetterdi smartfondarǵa da engize bastaǵan. Búgingi tańda telefondarǵa eń kóp suranysqa ıe 8 memlekettik qyzmet qosylǵan. Olar eGov mobile platformasynda, sondaı-aq ekinshi deńgeıli bankterdiń mobıldi qosymshalarynda qoljetimdi.
Olar:
- - avtokólikti tirkeý jáne qaıta jabdyqtaý;
- - júrgizýshi kýáligin berý;
- - turǵylyqty jeri boıynsha tirkeý jáne tirkeýden shyǵarý;
- - shekaralas aýmaqtardyń turǵyndary úshin mekenjaıdy rastaý;
- - elde turaqty turýǵa jáne sheteldikterge ýaqytsha turýǵa qujat rásimdeý.
