Júrgizýshi kýáligin alý túbegeıli ózgeredi: endi emtıhandy sheksiz tapsyrýǵa bolady

Úkimettiń baspasóz qyzmetiniń málimetinshe, keńes barysynda QR Іshki ister mınıstrligimen birlesip, júrgizýshi kýáligin alý úderisiniń ashyqtyǵy men ádildigin qamtamasyz etýge, azamattar úshin qolaılylyqty arttyrýǵa, sybaılas jemqorlyq táýekelderin azaıtýǵa jáne júrgizýshilerdi daıarlaý sapasyn kúsheıtýge baǵyttalǵan naqty sharalar qaralyp, bekitildi.

Birinshiden, engiziletin jańashyldyqtarǵa sáıkes azamattar júrgizýshi kýáligin alý úshin emtıhandy aqyly negizde, áreketter arasyndaǵy aralyqty keminde 10 kúntizbelik kún saqtaı otyryp, shekteýsiz tapsyra alady.

Aıta ketý kerek, qazir azamattarǵa 3 tegin múmkindik beriledi: alǵashqy eki múmkindik — 1 kún aralyqpen, úshinshisi — 30 kúnnen keıin. Atalǵan múmkindikter aıaqtalǵan soń qaıta oqýdan ótý talap etiletin, bul jekelegen jaǵdaılarda azamattardy júrgizýshi kýáligin zańsyz jolmen alýǵa ıtermeleıtin jaǵdaılar týǵyzatyn. Jańa norma rásimdi anaǵurlym qoljetimdi etip, artyq shekteýlerdi alyp tastaýǵa jáne sybaılas jemqorlyq kórinisteriniń táýekelin tómendetýge múmkindik beredi.

Ekinshi shara retinde QR Ǵylym jáne joǵary bilim mınıstrliginiń Ulttyq testileý ortalyǵynyń Astana qalasyndaǵy fılıaly bazasynda pılottyq joba sheńberinde osy ortalyqta qoldanylatyn akademııalyq adaldyqty qamtamasyz etý tehnologııalary synaqtan ótkiziledi. Keıin bul tehnologııalardy júrgizýshi kýáligin alý úshin teorııalyq emtıhan tapsyrýdyń búkil júıesinde qoldaný josparlanyp otyr. Tehnologııalardy aprobatsııalaýmen qatar, Ulttyq testileý ortalyǵy teorııalyq emtıhan testilerine keshendi psıhometrııalyq zertteýler júrgizedi. Bul zertteýler olardyń kólik quralyn qaýipsiz basqarýǵa qajetti bilimdi, bilik pen daǵdylardy shynaıy baǵalaý quraly retinde jaramdylyǵyn rastaýǵa baǵyttalady.

Úshinshi jáne tórtinshi sharalar aıasynda emtıhan ótkizý protsesine jasandy ıntellekt tehnologııalary engiziledi. Atap aıtqanda, teorııalyq emtıhan qabyldaý kezinde tolyqtyrylǵan shynaıylyq (AR), al praktıkalyq emtıhandy baqylaýda kompıýterlik kórý (Computer Vision) tehnologııasy qoldanylady. Bul tyıym salynǵan tehnıkalyq quraldardy paıdalaný táýekelin azaıtyp, buzýshylyqtardy naqty tirkeýge múmkindik beredi.

Besinshi shara retinde júrgizýshi kýáligin alýǵa qatysty tsıfrlyq sheshimderdiń aqparattyq qaýipsizdigin barynsha kúsheıtý kózdeledi. Osy maqsatta olardy aqparattandyrýdyń asa mańyzdy obektileri tizbesine engizý múmkindigi qarastyrylýda. Bul quqyq buzýshylyqtar men ruqsatsyz aralasý úshin jaýapkershilikti, qylmystyq jaýapkershilikke deıin, kúsheıtýge múmkindik beredi.

Altynshy mańyzdy shara sheńberinde ákimshilik jaýapkershilikke qatysty normalardy engizý qarastyrylǵan. Bul jaýapkershilik qyzmet alýshylarǵa da, júrgizýshi kýáligin zańsyz alýǵa járdem kórsetetin tulǵalarǵa da qoldanylady. Sharalar emtıhan tapsyrý protsesinde buzýshylyqtar anyqtalǵan jaǵdaıda qabyldanady. Olardyń qataryna tyıym salynǵan qurylǵylardy, mıkroqulaqqaptardy, mıkrokameralardy, sondaı-aq baılanys sıgnaldaryn qabyldaıtyn jáne taratatyn quraldardy paıdalaný jatady. Budan bólek, teorııalyq emtıhan tapsyrý quqyǵynan 1 jylǵa aıyrý múmkindigi engiziledi.

Jetinshi shara retinde avtomektepterdiń qyzmetine qoıylatyn talaptardy kúsheıtý kózdeledi. Olardyń jumysyn baǵalaý kezinde júrgizýshilerdi daıarlaý sapasy men azamattardyń keri baılanysy eskeriledi. Sondaı-aq olardyń qyzmetin lıtsenzııalaý engizý josparlanyp otyr. Júrgizýshilerdi daıarlaý sapasy tómen bolǵan jaǵdaıda lıtsenzııany tolyq keri qaıtaryp alý sharasy qarastyrylady.

— Atalǵan sharalardy júzege asyrý júrgizýshi kýáligin alý rásimindegi artyq shekteýlerdi joıýǵa, onyń ashyqtyǵy men azamattar úshin qolaılylyǵyn arttyrýǵa, sondaı-aq sybaılas jemqorlyq táýekelderin tómendetýge baǵyttalǵan, — delingen habarlamada.

Budan buryn Jambyl oblysynda júrgizýshi kýáliginen aıyrylǵan azamat qaıtadan rólge otyrǵanyn jazǵanbyz.