Júrgizýshi kýáligin alý úshin tapsyratyn emtıhannyń erejeleri ózgerdi
ASTANA. KAZINFORM — Elimizde júrgizýshi kýáligin alý úshin emtıhandardy qaıta tapsyrý tártibi naqtylandy. Jańa erejelerge sáıkes, emtıhandy úsh ret sátsiz tapsyrǵannan keıingi árbir qaıta tapsyrý aqyly bolady.
Іshki ister mınıstri tıisti buıryqqa ózgerister engizdi. Olar júrgizýshi kýáligin alǵash ret alýǵa nıetti azamattarǵa da, kýáligin aýystyrýy qajet adamdarǵa da qatysty. Atap aıtqanda, emtıhan ótkizý jáne ony qaıta tapsyrý tártibi qaıta qaraldy.
Emtıhandy qashan qaıta tapsyrýǵa bolady
Qujatqa sáıkes, emtıhandy birinshi ret tapsyra almaǵan jaǵdaıda, teorııalyq nemese praktıkalyq emtıhandy qaıta tapsyrý kelesi jumys kúnine belgilenedi.
Eger úmitker teorııalyq nemese praktıkalyq emtıhannan eki ret óte almasa, kelesi áreketke keminde 10 kúntizbelik kúnnen keıin ǵana ruqsat beriledi.
Úsh ret teris nátıje alǵannan keıin tıisti emtıhandy qaıta tapsyrý aqyly bolady. Onyń quny Memlekettik korporatsııanyń tarıfteri boıynsha belgilenedi. Bul rette, árbir árekettiń arasynda keminde 10 kúntizbelik kún ótýi tıis.
Emtıhannyń ótetin ornyn, kúnin jáne ýaqytyn bos oryndar bolǵan jaǵdaıda tańdaýǵa bolady. Alaıda emtıhanǵa ony ótkizetin kúnge deıin keminde bir jumys kúni buryn jazylý qajet.
Azamattar qandaı jaǵdaıda emtıhannan bir jylǵa shettetilýi múmkin
Eger teorııalyq emtıhan kezinde úmitker uıaly telefondy, shpargalkany nemese basqa elektrondyq qurylǵylardy paıdalansa, emtıhan materıaldarymen almassa ne emtıhan zalynan shyǵyp ketse, synaq toqtatylady.
Mundaı jaǵdaıda úmitkerge «Tapsyrmady» degen baǵa qoıylyp, teorııalyq emtıhandy qaıta tapsyrýǵa tek 12 aıdan keıin ǵana ruqsat beriledi.
Emtıhan nátıjelerine shaǵymdanýǵa bola ma
Úmitkerler teorııalyq emtıhan nátıjelerimen nemese praktıkalyq júrgizý kezinde qoıylǵan aıyppul baldarymen kelispegen jaǵdaıda apellıatsııa bere alady.
Shaǵymdy qaraý barysynda foto jáne beınematerıaldar paıdalanylady. Sheshimdi keminde úsh adamnan turatyn komıssııa qabyldaıdy. Onyń quramyna ýákiletti organnyń, Memlekettik korporatsııanyń jáne oqý uıymynyń ókilderi kiredi.
Júrgizýshi kýáligin aýystyrý kezinde ne ózgeredi
Buıryqta júrgizýshi kýáligin aýystyrý tártibi de naqtylanǵan. Tsıfrlyq servıster arqyly ótinish bergen kezde keıbir qujattardy skanerlengen nusqada usynýǵa jáne memlekettik bajdy onlaın tóleýge bolady.
Sheteldik júrgizýshi kýáligin qazaqstandyq kýálikke aýystyrý úshin teorııalyq emtıhandy sátti tapsyrý jáne qujattyń túpnusqalyǵyn shet memlekettiń quzyretti organy arqyly rastaý talap etiledi.
Sonymen qatar, jol júrisi qaǵıdalary boıynsha bilimdi tekserýdiń jeke tártibi engizildi. Mundaı emtıhanǵa «TsON» mobıldi qosymshasy arqyly jazylýǵa bolady. Emtıhan nátıjeleri týraly málimetter 12 aı boıy saqtalady.
Aıta keteıik, buǵan deıin «Júrgizýshi kýáligine emtıhandy jeke uıymdar qabyldaı ma?» degen suraqqa ІІM jaýap bergen edi.
