Júrgizýshi kýáligin alý emtıhanyna qatysty jańa talaptar ázirlendi
ASTANA. KAZINFORM – ІІM kólik quraldaryn tirkeý jáne júrgizýshi kýáligin alý úshin emtıhan tapsyrý qaǵıdalaryna túzetýler ázirledi.
Іshki ister mınıstrligi kólikti tirkeý jáne júrgizýshi kýáligine emtıhan tapsyrý qaǵıdalaryna ózgerister ázirledi.
Maqsat — memlekettik qyzmetterdi alýdy jeńil ári jyldam etý. Artyq rásimder alynyp tastaldy.
— Kólikti qaıta jabdyqtaǵannan keıin ony bólek qaratýdyń qajeti joq. Engizilgen ózgeristiń qaýipsiz ekenin rastaıtyn qujat bolsa jetkilikti. Emtıhandy birinshi ret tapsyra almasańyz, kelesi jumys kúni qaıta tapsyrýǵa bolady.
Ekinshi ret te sátsiz bolsa, daıyndalýǵa 10 kún beriledi. Teorııalyq nemese praktıkalyq emtıhannan úsh ret óte almasańyz, sol emtıhandy keıin qaıta tapsyrý aqyly bolady. Bul shara emtıhanǵa qosymsha daıyndalý úshin engizilip otyr, - dedi Aqtoty Boranova.
Sonymen qatar teorııalyq emtıhandy tapsyryp, praktıkalyq emtıhannan óte almasańyz, teorııadan alǵan nátıje saqtalady.
— Sheteldik júrgizýshi kýáligin Qazaqstan kýáligine aýystyrý úshin aldymen teorııalyq emtıhandy tapsyrý qajet. Budan bólek, jol qaýipsizdigine jaýapty ýákiletti organ kýálikti bergen elge resmı suraý jiberedi. Ol eldiń quzyretti organy kýáliktiń túpnusqa ekenin rastaǵannan keıin ǵana kýálik aýystyrylady. Bul — jalǵan qujattardan qorǵaý sharalary. Ózińizdi jáne jaqyndaryńyzdy saqtańyz! — dedi ІІM ákimshilik polıtsııa komıteti basqarma bastyǵynyń orynbasary Aqtoty Boranova.
Aıta ketelik jol erejesin óreskel buzatyndar júrgizýshi kýáliginen 1 jylǵa aıyrylýy múmkin ekendigin jazǵan edik.
