Júrgizýshi kýáligin alǵash ret rásimdeý tártibi ózgerdi
ASTANA. KAZINFORM — Júrgizýshi kýáligin alǵash ret alý qyzmeti endi «TsON» mobıldi qosymshasy arqyly qoljetimdi boldy. Bul týraly «Azamattarǵa arnalǵan úkimet» memlekettik korporatsııasynyń baspasóz qyzmeti habarlady.
— Endi alǵash ret júrgizýshi kýáligin alǵysy keletin azamattar ótinishti mamandandyrylǵan halyqqa qyzmet kórsetý ortalyǵyna barmaı-aq, tikeleı «TsON» mobıldi qosymshasy arqyly bere alady. Júıe medıtsınalyq anyqtamasynyń bar-joǵyn, avtomektepti aıaqtaý týraly kýáligin jáne shekteýlerdiń bolýyn memlekettik derekter bazasy arqyly avtomatty túrde tekseredi.
Ótinish jiberilgennen keıin azamat ózine yńǵaıly ýaqytta teorııalyq jáne praktıkalyq emtıhandarǵa jazyla alady. Osylaısha, memlekettik baj tólemi emtıhandardy sátti tapsyrǵan soń mamandandyrylǵan HQO bóliminde tólenedi. Bul tásil rásimdeý protsesin ońtaılandyryp, azamattar úshin anaǵurlym qolaıly jaǵdaı jasaıdy, — delingen habarlamada.
Pılottyq joba Іshki ister mınıstrligi men Jasandy ıntellekt jáne tsıfrlyq damý mınıstrliginiń birlesken buıryǵy aıasynda júzege asyp jatyr. Qujat júrgizýshi kýálikterin berý tártibin jańartyp, tsıfrlyq tehnologııalardy keńinen engizýge baǵyttalǵan.
Qazirgi ýaqytta jańa qyzmet elimizdiń barlyq óńirinde qoljetimdi. Pılottyq jobanyń merzimi 2026 jyldyń 1 qyrkúıegine deıin belgilengen. Osy kezeńde qyzmettiń tıimdiligi men qolaılylyǵy baǵalanyp, taldaý nátıjesinde jańa tártipti turaqty túrde engizý máselesi qaralady.
Jańa rásimdeý formaty júrgizýshi kýáligin alǵash ret alatyndar úshin bul protsesti burynǵydan da jeńil, yńǵaıly jáne qoljetimdi etti.
Sonymen qatar, «TsON» mobıldi qosymshasy bolashaq júrgizýshilerge qosymsha múmkindikter usynady: qoldanýshylar teorııalyq jáne praktıkalyq emtıhandarǵa, sondaı-aq synaq emtıhanyna jazyla alady. Budan bólek, qosymshada kólik satyp alý-satý shartyn rásimdeý, avtokólik tarıhyn tekserý jáne ózge de elektrondyq qyzmetterdi paıdalaný sııaqty paıdaly fýnktsııalar qamtylǵan.
Aıta ketelik Oralda jol erejesin 25 ret buzǵan 21 jastaǵy júrgizýshi jalǵan nómirmen júrgeni týraly jazǵan edik.