Júrgizýshi kýáligin alatyndar 073/e anyqtamasyn qaǵaz túrinde tapsyrmaıtyn boldy

ASTANA. KAZINFORM — Memlekettik korporatsııa júrgizýshi kýáligin alý kezinde 073/e medıtsınalyq anyqtamasyn avtomatty túrde tekserýdi engizdi. Bul týraly «Azamattarǵa arnalǵan úkimet» Memlekettik korporatsııasy málim etti.

«Azamattarǵa arnalǵan úkimet» Memlekettik korporatsııasy Halyqqa qyzmet kórsetý ortalyqtarynyń aqparattyq júıesin Densaýlyq saqtaý mınıstrliginiń aqparattyq júıesimen biriktirdi. Endi júrgizýshi kýáligin alý kezinde 073/e úlgisindegi jalǵan medıtsınalyq anyqtama usyný tyıylmaq. 

— Endi azamattarǵa «Júrgizýshi kýáligin berý» memlekettik qyzmetin alý kezinde medıtsınalyq anyqtamany qaǵaz túrinde tapsyrýdyń qajeti joq. Medıtsınalyq tekserýdiń nátıjesi avtomatty túrde IAJ HQKO-ǵa kelip túsedi. Bul jańashyldyq ótinishterdiń qaraý merzimin jedeldetýge, jalǵan qujattardy usyný jaǵdaılaryn boldyrmaýǵa jáne júrgizýshi kýáligin alý rásiminiń ashyqtyǵyn arttyrýǵa múmkindik beredi, — delingen habarlamada.

Atalǵan bastama aýqymdy tsıfrlyq transformatsııanyń bir bóligine aınaldy jáne bul memlekettik organdar arasyndaǵy ózara is-qımyldy ońtaılandyrý arqyly memlekettik qyzmetterdiń sapasy men qoljetimdiligin arttyrýǵa baǵyttalǵan.

Aıta ketý kerek, júrgizýshi kýáliginiń qoldanylý merzimi aıaqtalmaı turyp aýystyrylǵan jaǵdaıda, medıtsınalyq tekserýden ótý talap etilmeıdi. Sondaı-aq, psıhonevrologııalyq jáne narkologııalyq dıspanserlerden anyqtama usyný qajettiligi joq.

Eske sala keteıik, buǵan deıin mamandandyrylǵan halyqqa qyzmet kórsetý ortalyǵynda ótkiziletin teorııalyq jáne tájirıbelik emtıhanǵa endi tek «HQKO» qosymshasy arqyly ǵana jazylýǵa bolatynyn jazǵan edik.