Júrgizýshi kýáligin 10 sáýirge deıin aýystyrý qajet – feık

ALMATY. KAZINFORM – Almaty qalasynyń Polıtsııa departamenti áleýmettik jelide taraǵan málimetke baılanysty túsinik berdi.

Polıtsııa málimetine sáıkes, jelidegi «merzimi aldaǵy úsh jylda aıaqtalatyn júrgizýshi kýáligin 10 sáýirge deıin mindetti túrde aýystyrýy kerek» degen aqparat shyndyqqa janaspaıdy. 

– Júrgizýshi kýálikterin aýystyrý tártibine eshqandaı ózgerister engizilgen joq. Kýálikter jaramdylyq merzimi aıaqtalǵan kezde eshqandaı qosymsha talaptarsyz, qaıta tapsyrmaı, josparly túrde aýystyrylady. Azamattardy jalǵan aqparatqa senbeýge shaqyramyz, - dep habarlady departamentten.

Sonymen qatar tártip saqshylary kórineý jalǵan aqparat taratý QR Qylmystyq kodeksiniń 274-babyna sáıkes qylmystyq jaýapkershilikke ákep soǵatyn eskertti. 

Eske salaıyq, buǵan deıin Almatyǵa baǵyt alǵan ushaq ishinde dáret syndyrǵan sheteldik jazalanǵanyn jazǵanbyz.