Júrgizýshi aptap ystyqta jolǵa shyǵarda neni eskerý kerek
ASTANA. KAZINFORM – Elimizdiń ońtústiginde aptap ystyq qaıta bastaldy. QazAvtoJol kompanııasynyń mamandary +30°C jáne odan joǵary aýa temperatýrasy kólik qozǵalysy úshin qaýip tóndiretinin eskertip, júrgizýshilerge jolǵa shyǵar aldynda nazar aýdaratyn mańyzdy keńester usyndy.
Kóliktegi negizgi qaýipter jáne aldyn alý joldary:
Qozǵaltqyshtyń qyzyp ketýi
Salqyndatqysh suıyqtyqtyń jetkiliksizdigi, radıatordyń lastanýy nemese termostattyń aqaýy qozǵaltqyshtyń qyzyp ketýine sebep bolady.
Ne isteý kerek:
– antıfrız deńgeıin tekserý
– radıator tazalyǵyna kóz jetkizý
– uzaq joldan soń qozǵaltqyshty birden sóndirmeı, biraz sýytý
Kondıtsıonerdi shamadan tys qoldaný
Uzaq ýaqyt toqtaýsyz jumys istegen salqyndatqysh júıe qozǵaltqyshqa salmaq túsiredi.
Keńes: kondıtsıonerdi ortasha qýatta qoldanyńyz jáne qajet bolǵanda óshirip, jeldetýdi qoldanyńyz.
Órt shyǵý qaýpi
Kólik ishindegi joǵary temperatýra salondaǵy keıbir zattardyń janýyna nemese jarylýyna sebep bolýy múmkin.
Kólikte qaldyrýǵa bolmaıtyn zattar:
– aerozol ballondar
– power bank, zarıadtaǵyshtar
– plastıkalyq bótelkeler
– kózildirik, áınek zattar
Elektr júıesi men symdardyń qyzyp ketýi
Eskirgen nemese aqaýly symdar ystyqta jyldam qyzyp, qysqa tuıyqtalýǵa ákelýi múmkin.
Keńes: kóligińizdegi elektr symdarynyń jaı-kúıin teksertip turyńyz.
Katalızatordyń shamadan tys qyzýy
Tehnıkalyq aqaý bolǵan jaǵdaıda katalızatordan ot shyǵýy múmkin.
Keńes: dybysty báseńdetkish júıeni josparly túrde tekserip otyryńyz.
Júrgizýshi densaýlyǵyna tónetin qaýip
Ystyq kezde zeıin qoıý qabileti tómendeıdi, bul — jol-kólik oqıǵasyna tikeleı qaýip.
Keńes:
– ár 1,5–2 saǵat saıyn toqtap, demalyńyz
– jolǵa tańerteń nemese keshke shyǵyńyz
– kólikte qosymsha aýyz sý ustańyz
Órt sóndirgishtiń bolmaýy
Keńes:
– órt sóndirgish qural mindetti túrde kólikte bolsyn
– ony ońaı alýǵa bolatyn jerde saqtańyz
- Saparǵa shyǵarda aýa raıy men kólik jaı-kúıin tekserińiz. Jol qaýipsizdigi – óz qolyńyzda, - delingen QazAvtoJol taratqan keńeste.
Aıta keteıik, Aqtóbe-Atyraý tasjolyndaǵy jol-kólik apatynan 4 adam kóz jumdy.