Júrgizýshilerdiń salaqtyǵy urlyqqa sebep bolady - polıtsııa
TARAZ. QazAqparat - Jambyl oblystyq ishki ister departamentiniń ókilderi avtomobılderdiń qosalqy bólshekteri men jeke buıymdar urlyqtary týraly pikir bildirdi, dep habarlaıdy QazAqparat tilshisi.
«2018 jyldyń alty aıynda Jambyl oblysynda qylmystyq polıtsııa basqarmasynyń qyzmetkerleri avtomobılderdiń qosalqy bólshekteri men jeke buıymdar urlyǵynyń 19 deregin ashty. 2017 jyldaǵy jalpy kórsetkish 92 bolatyn. Urylar negizinen akkýmýlıator, avtomagnıtola, uıaly telefon sııaqtylardy qoldy etedi», - deıdi ІІD baspasóz qyzmetiniń ókilderi.
Polıtseılerdiń sózine qaraǵanda, kóbinese urlyqqa avtomobıl ıeleriniń salǵyrttyǵy da sebep bolady. Jambyl oblysyndaǵy avtomobılderdiń kópshiliginde dabyl júıesi ornatylmaǵan.
Jambyl ІІD qyzmetkerleri únemi bazarlarda, saýda oryndarynda túsindirý jumystaryn júrgizip, saqtyqqa shaqyrǵan býkletter taratady ári buryn quqyqbuzýshylyq jasap, profılaktıkalyq esepte turatyndar da tekseriledi.
