Júrgizýshiler polıtseılerge qarsylyq kórsetip, jabyq trassaǵa shyqpaq boldy
NUR-SULTAN. QazAqparat – Qaraǵandy oblysynda joldyń jabylýyna baılanysty avtotrassaǵa shyǵýǵa tyıym salǵan polıtseılerge qarsylyq kórsetken júrgizýshiler jazalanýda, dep habarlaıdy QazAqparat Polisia.kz saıtyna silteme jasap.
Oqıǵa Qaraǵandy oblysynda «Nur-Sultan-Temirtaý» tasjolynda bolǵan.
«Munda aýa raıynyń qolaısyzdyǵy men jańbyrdan keıingi kóktaıǵaqqa baılanysty «QazAvtoJol» UK»AQ 26 aqpanda saǵat 20:45-ten bastap barlyq kólik túrleriniń qozǵalysyna ýaqytsha shekteý qoıǵan edi. Alaıda, belgilengen shekteýler men tyıymdarǵa qaramastan, birqatar júrgizýshi densaýlyǵy men jolaýshylardyń ómirin qaterge tige otyryp, saparyn jalǵastyrýǵa tyrysty. Polıtsııa jabyq turǵan tasjolǵa shyǵýdyń aldyn alý úshin sharalar qabyldady», - delingen habarlamada.
Polıtsııa qyzmetkerleriniń zańdy talaptaryna baǵynbaǵany úshin eki «Gazel» jáne «Hyundai» jeńil avtokólikteriniń júrgizýshileri jaýapqa tartylyp jatyr. Júrgizýshilerdiń birine sondaı-aq, polıtsııa qyzmetkerin kóligimen qasaqana basýǵa tyrysý aıyby taǵylmaq.
«Oqıǵanyń basqa qatysýshylary anyqtaldy jáne olar qoldanystaǵy zańnamaǵa sáıkes jaýapqa tartylatyn bolady. 28 aqpanda saǵat 13:00-de jol qozǵalysyna shekteý alynyp tastaldy. Qazirgi ýaqytta jol ashyq», - dedi ІІM-nen.
