Júrgizýshiler endi aıyppuldardy POS-termınal arqyly ereje buzǵan jerinde tóleı alady
ASTANA. QazAqparat - 1 mamyrdan bastap Astana qalasy boıynsha jańa ilki joba iske qosyldy. Bul jobanyń paıdasy - elordadaǵy kólik júrgizýshiler jol erejesin buzsa, jańa POS-termınaldar arqyly aıyppuldy sol ornynda tólep kete alady. Al, zań boıynsha, ózderińiz biletindeı, dál ornynda tólengen aıyppuldarǵa avtomatty túrde 50 paıyzdyq jeńildik bar.
Búgin Astana qalalyq Іshki ister departamenti arnaıy baspasóz máslıhatyn ótkizip, tipti, jýrnalısterdiń kózinshe jol erejesin buzǵan bir júrgizýshiden POS-termınar arqyly aıyppul óndirip aldy.
«2016 jyldyń 26 sáýirinde elordanyń Іshki ister departamenti «ForteBank» AQ-men áriptestik jónindegi memorandýmǵa qol qoıdy. Memorandýmǵa sáıkes, jol qozǵalysy erejesin buzǵan azamattardan aıyppuldy sol ornynda qabyldaı alatyn termınaldar shyǵaryldy. Ázirge, Astana qalasy boıynsha osyndaı 30 termınal bar. Ol termınaldar jol-patýrldik polıtsııa qyzmetkerlerine taratyldy. Bul ilki joba jáne ilki jobanyń qorytyndysyn mamyrdyń 25-i kúni jarııalaımyz. Jobanyń paıdasyn tarazyǵa sala kele, bolashaqta termınaldardyń sanyn kóbeıtermiz»,-dedi qalalyq ІІD Ákimshilik polıtsııa basqarmasynyń bólim basshysy Nurjan Ádilov.
Al, «ForteBank» ókili Sholpan Nurymbetovanyń (basqarma tóraǵasynyń orynbasary - agenttik) aıtýynsha, POS-termınaldar aıyppuldardy tóleıtin eń jyldam tásildiń biri. «Ózderińiz bilesizder, zań boıynsha aıyppul sol ornynda tólense, oǵan 50 paıyzdyq jeńildik bar. Onyń ústine, halyqqa qyzmet kórsetý ortalyqtary men bankterde kezek kútpeısiz», - deıdi Sh.Nurymbetova.
Bir aıta keterligi, POS-termınal «ForteBank-tiń tólem kartochkalaryn ǵana emes, búkil bank kartalaryn qabyldaıdy jáne qyzmet úshin az komıssııa alady. Tek este saqtańyz, POS-termınaly bar jol patrýli sizden mindetti túrde kartochkamen qatar, jeke kýáligińizdi talap etýi kerek jáne sizge mindetti túrde ekinshi chek berýi kerek. Jáne siz ereje buzyp, qolyńyzdan kartochka bolmasa, janyńyzdaǵy týǵan-týysyńyzdyń, tipti jubaıyńyz ben ata-anańyzdyń kartochkasyn paıdalaný múlde múmkin emes.
Іlki joba ázirge Astana qalasyn ǵana qamtyp otyr.
