Júrgizýshige qaraqshylyq shabýyl jasaǵandar ustaldy -ІІD
ASTANA. 24 mamyr. QazAqparat /Qanat Mámetqazyuly/ - Aǵymdaǵy jyldyń 17 mamyrynda Astana qalasynda jeke taksı kóliginiń júrgizýshisine qaraqshylyq shabýyl jasaǵan top ustaldy. Bul týraly búgin Іshki ister departamentinde ótken baspasóz máslıhatynda málim boldy.
«Jábirlenýshi keshki mezgilde jol boıynda kólik toqtatyp turǵan jigitke toqtap, onyń ótinishi boıynsha Ortalyq bazarǵa deıin jetkizip salýǵa kelisedi. Aıtylǵan jerge kelip toqtaı bergende kólik júrgizýshisiniń janynda otyrǵan jolaýshy shalt qımyl jasap, avtokóliktiń kiltin sýyryp alǵan. Dál osy kezde ony kútip turǵan eki sybaılasy da kólikke otyryp, kúsh qoldaný, pyshaqpen qorqytý arqyly jábirlenýshi kólik ıesinen onyń jeke zattaryn, kúrtesin, aıfon qalta telefonyn, altyn alqasy men 5 myń teńgedeı qarajatyn tartyp alǵan», - deıdi ІІD baspasóz hatshysy Nurdildá Oraz. Onyń aıtýynsha, jedel izdestirý sharasynyń nátıjesinde polıtsııa qyzmetkerleri qaraqshylyq jasady degen kúdikpen 3 adamdy tutqyndady. Qaraqshylyq shabýyl jasaǵan kúdiktiniń bireýi 1992 jyly týǵan Astana turǵyny bolsa, qalǵan ekeýi Monǵolııa Respýblıkasynan kelgen oralmandar. Ustalǵandarǵa QR QK 179-baby boıynsha qylmystyq is qozǵalǵan. Olar 5-ten 12-jylǵa deıin bas bostandyǵynan aıyrylýy múmkin.
