Júrgizýshi mas bolǵan: Tarazda jol apatynan úsh adam aýrýhanaǵa tústi
TARAZ. QazAqparat – Tarazda eki jeńil kólik soqtyǵysyp, saldarynan úsh adam aýrýhanaǵa tústi, dep habarlaıdy QazAqparat tilshisi.
Oblys ortalyǵy – Taraz qalasynyń Táýke han jáne Sańyraq batyr kósheleriniń qıylysynda «Lada» jáne «Opel Astra» kólikteri soqtyǵysyp, qatty soqqydan jolynan aýytqyp ketken «Opel Astra» avtokóligi baǵdarshamǵa urylǵan. Bul týraly oblystyq polıtsııa departamentiniń baspasóz qyzmeti habarlady.
«Atalǵan jol-kólik oqıǵasy saldarynan «Opel Astra» avtokóliginiń úsh jolaýshysy ártúrli dene jaraqatymen №1 qalalyq aýrýhanaǵa jetkizildi. Atalmysh fakti boıynsha QR QK 345-baby, 1-bóligimen sotqa deıingi tergeý bastaldy. Eki avtokólik te aıyp turaǵyna qoıyldy» delingen vedomstvo habarlamasynda.
Saraptama nátıjesine sáıkes, 27 jastaǵy «Lada» avtokóligi júrgizýshisiniń alkogoldi ishimdik iship, «orta dárejede» mas bolǵany belgili boldy. Qazirgi ýaqytta atalǵan is boıynsha jan-jaqty tergeý júrip jatyr.
