Júrgizýshi kýáliginiń jańa úlgileri engiziledi
ASTANA. 26 sáýir. QazAqparat - Elimizde júrgizýshi kýáliginiń jańa úlgileri engiziledi. Ol jeti kategorııadan turady. Bul týraly búgin Májiliste jol qaýipsizdigi máselelerine arnalǵan dóńgelek ústel barysynda málim boldy.
«Jol qaýipsizdigi týraly konventsııa talaptaryna sáıkes, respýblıka aýmaǵynda júrgizýshi kýáliginiń jańa úlgileri engiziledi. Onda 7 kategorııa: A, B, C, D, BE, CE, DE jáne osyǵan táýeldi 6 kategorııalar: A1, B1, C1, D1, C1E jáne D1E qamtylyp otyr», - deıdi ІІM Jol polıtsııasy komıteti Jol qozǵalystaryn qamtamasyz etýdi úılestirý basqarmasynyń bastyǵy Qanat Sádýaqasov. Onyń aıtýynsha, bundaı jańa úlgi sońǵy ýaqytta keńinen taralǵan skýter, mokık, trıtsıkl jáne basqa da shaǵyn kólikterdi paıdalaný máselelerin retke keltirmek.
«Jańa kýálik negizinen jańadan jol júrgizý quqyǵyn ıelenýshilerge beriledi. Al qoldanystaǵy júrgizýshi kýáligi onyń merzimi bitkenge deıin jaramdy bolyp sanalady. Jańa kýálikke aýystyrǵysy kelgender ony qalaýynsha júzege asyra alady», - deıdi jol polıtsııasynyń ókili. Onyń aıtýyna qaraǵanda, jańa kýálikterdi engizý barysynda respýblıkalyq bıýdjetten qosymsha shyǵystar talap etilmeıdi. Jańa kýálikterdi daıyndaý qoldanystaǵy memlekettik tapsyrys aıasynda júzege asyrylatyn bolady.
